Британия шаҳзодаси Гарри ватанига ташрифи чоғида унга полиция ҳимоясини қайтариши учун Британия ҳукуматига қарши қонуний чоралар кўришни режалаштирмоқда. Бу ҳақда BBC News хабар берди.
Шаҳзода Гарри хавфсизлиги етарли даражада ҳимояланмагани учун ҳозирча ватанига боришдан қўрқади. Гарри ва унинг оиласи АҚШда доимий истиқомат қилади. Буюк Британияга ташриф буюриш учун эса у Америка хусусий фирмасидан қўриқчиларни ёллашга мажбур бўлади. Аммо шаҳзода фирма ходимлари бундай юқори мартабали одамларни ҳимоя қилишга қодир эмаслигидан шикоят қилмоқда. Қўриқчиларда, шунингдек, шаҳзоданинг хавфсизлигини таъминлаш учун зарур бўлган Британия разведкаси маълумотларидан фойдаланиш имконияти йўқ.
Шаҳзоданинг адвокатлари Британия ҳукуматига мактуб йўллаб, Гарри мамлакатга ташрифи чоғида уни давлат ҳимояси билан таъминлашни сўраган ва акс ҳолда қонуний чоралар кўриш билан таҳдид қилган. Шаҳзода хавфсизлик билан боғлиқ барча харажатларни бюджет пулларидан эмас, балки ўз ҳисобидан тўлашни ваъда қилмоқда.
Бу Буюк Британия тарихида биринчи марта қироллик оиласи аъзосининг мамлакат ҳукумат билан судлашиш ҳолатига айланиши мумкин.
Изоҳ (0)