Германияда коронавирус чекловларига қарши яна бир норозилик намойишлари бўлиб ўтди

Германияда коронавирусга қарши курашиш мақсадида жорий этилган чекловлар ва вакцинацияга қарши навбатдаги норозлик намойишлари бўлиб ўтди, деб хабар беради DPA. Аммо бу сафар кўчаларга намойишчиларга қарши бўлган фуқаролар ҳам тўпланган.

Хусусан, Гамбургда суд эмланишга қарши бўлганларнинг намойиш ўтказишини тақиқлаган, шунингдек, апелляция ҳам рад этилган, шунга қарамай 3 мингга яқин одам норозилик намойишлари учун тўпланган. Аввалига ташкилотчилар уларнинг сонини 15 минг деб кўрсатган. Шу билан бирга, мингга яқин одам намойишчиларга қарши акцияга тўпланган бўлиб, улар «конспирологик мафкураларга қарши бирдамлик ва маръифатни қўллаб-қувватлаш» тарафи чиқиш қилган.

Бундан ташқари, Фрейбургда ҳукуматнинг коронавирус сиёсатига қарши 6 мингга яқин норозилик намойишчиси тўпланган — уларга қарши акция ўтказганлар сони эса камроқ.

Шу билан бирга, икки гуруҳ намойишчилар ўртасида можаро юзага келмаслиги учун шаҳарларга полиция кучлари жалб этилган.

Шунингдек, Дюссельдорфда мажбурий вакцинацияга қарши шиорлар остида 7 мингга яқин одам кўчага чиққан, митинг тинч ўтгани айтилмоқда. Ўнлаб ҳолатларда ниқоб тақмаган фуқаролар жаримага тортилган, ёнида пичоқ кўтариб юрганлар қўлга олинган.

Ўз навбатида, Конституцияни ҳимоя қилиш бўйича федерал идора раҳбари Томас Халденванг ҳукумат сиёсатига қарши норозилик билдираётганлар томонидан янги хавф борлигини маълум қилган. Амалдорнинг айтишича, ушбу фуқароларни аниқ ўнг ёки сўлчилар деб таснифлаб бўлмайди, улар муайян мафкура билан бирлаштирилмайди, лекин улар учун демократик институтлар ва ҳокимият вакилларига нисбатан нафрат умумий ҳисобланади.

«Мавзудан қатъи назар — коронавирус, миграция сиёсати ёки фалокатли сув тошқинлари бўлсин — ушбу одамларнинг айримлари давлат уддалай олмаётгани ва ҳеч нарса қилмаётгани тўғрисида тасаввурни пайдо қилишга уринади», — дейди Халденгванг.

Аввалроқ Бельгия ва Чехияда коронавирус чекловларига қарши норозилик акцияси бўлиб ўтгани тўғрисида хабар берилганди. Хусусан, Брюсселда бир неча минг киши қўлларига мажбурий вакцинацияга қарши плакатларни кўтариб олган ҳолда Европа даҳасига қадар марш юрган.