Қатарда коронавирус инфекцияси натижасида юзага келган асоратлар оқибатида уч ҳафталик чақалоқ вафот этди. Бу ҳақда амирлик Соғлиқни сақлаш вазирлиги матбуот хизмати Twitter’даги саҳифаси орқали маълум қилди.
«Соғлиқни сақлаш вазирлиги чуқур қайғу билан уч ҳафталик чақалоқ COVID-19 га боғлиқ инфекция оқибатида вафот этганини маълум қилади. Чақалоқнинг бошқа, хусусан, ирсий касалликлари бўлмаган», — дейилади хабарда.
Шунингдек, идоранинг қайд этишича, бу мамлакатда пандемия бошланганидан буён коронавирус оқибатида ҳалок бўлган иккинчи чақалоқ ҳисобланади.
Ҳукуматнинг маълумотларига кўра, Қатарда сўнгги кунларда коронавирус билан касалланиш ҳолатлари ортган, шу сабабли барча фуқаролар, жумладан, ҳомиладор аёллар ҳам COVID-19 га қарши уч марта эмланишга чақирилмоқда.
Таъкидланишича, аҳолиси 2,7 миллион бўлган Қатарда қарийб 300 минг кишида коронавирус тасдиқланган бўлиб, уларнинг 258 мингдан ортиғи соғайган, 626 нафари вафот этган. Шу билан бирга, амирликда аҳолини эмлаш кампанияси фаол давом этмоқда. 2020 йилнинг декабридан буён мамлакатда коронавирусга қарши 5,4 миллион дозадан вакцина қўлланилган. Аҳолининг бир қисми бустер доза билан ҳам эмланган.
Аввалроқ АҚШда қонида коронавирусдан ҳимояловчи антитана мавжуд бўлган чақалоқ дунёга келгани ҳақида хабар берилганди. Флорида штатининг Бока-Ратон шаҳри педиатрлари Пол Гильберт ва Чед Рудникнинг айтишича, боланинг онаси, тиббиёт ходими бўлган аёл январь ойида ҳомиладорликнинг 36-ҳафтасида Moderna вакцинаси билан эмланган. Уч ҳафта ўтиб эса аёл тетик ва соғлом қизалоқни дунёга келтирган.
Изоҳ (0)