Владимир Зеленский Россия президенти Владимир Путин билан учрашишга тайёр. Бу ҳақда Украина президенти маъмуриятининг бошлиғи Андрей Ермак маълум қилди, деб хабар беради «Коммерсантъ». Унинг сўзларига кўра, музокаралар Россия президенти бунга тайёр бўлиши билан ўтказилади.
«Президент кўп маротаба бу каби учрашувга тайёрлигини гапирган. У қачон ва қаерда бўлиш масаласи ҳозирча очиқ», — дейди Ермак. У шу орқали Зеленский ва Путиннинг учрашуви Пекиндаги Олимпиада ўйинлари очилишида бўлиб ўтиши мумкинми ёки йўқ деган саволга жавоб қайтарган. Украина президенти маъмуриятининг раҳбари Зеленский Путин билан тўғридан-тўғри музокаралар урушни тўхтатиш учун керак деб ҳисоблашини эслатиб ўтган.
Ермакнинг айтишича, Зеленский 2021 йилда Россия президенти билан бир марта «алоқа ўрнатишга» уринган, бироқ суҳбат амалга ошмаган. У бу қандай сабабга кўра амалга ошмаганини эслай олмаслигини таъкидлаган.
«Президентимиз қўнғироғи кутилаётганига ва жавоб беришларига ишончи комил бўлмаган жойга ҳеч қачон қўнғироқ қилмайди», — дея қўшимча қилади у. Апрель ойида Владимир Зеленский Путин билан музокара ўтказишга уринганини маълум қилганди: «Менда Россия урушни тўхтатишни истайдими, деб сўрашади. Бу саволга ҳаракатлар билан жавоб бериш мумкин: мен қўнғироқ қилдим — жавоб беришмади», — деганди у.
Андрей Ермак, шунингдек, Украина Россия билан «норманд формати» ва Донбасс бўйича уч томонлама алоқа гуруҳи доирасида мунтазам музокаралар ўтказиб келаётганини таъкидлаган.
Эслатиб ўтамиз, 20 апрель куни Зеленский Путинга Украинанинг Донбассидаги уруш кетаётган исталган жойида учрашишни таклиф қилганди. Путин бунга жавобан агар Украина президенти Донбасс муаммосини муҳокама қилмоқчи бўлса, аввал у Донецк ва Луганск Халқ Республикаларининг раҳбарлари билан учрашиши кераклигини ва шундан кейингина учинчи томон сифатида Россия раҳбарияти билан учрашиши мумкинлигини айтган. Шунингдек, у Россия томонининг Украина билан икки мамлакат ўртасидаги муносабатлар ҳақида гаплашишга тайёрлигини билдирган ва Зеленскийни «ўзига қулай бўлган исталган вақтда» Москвага келишга таклиф қилган.
Изоҳ (0)