Хитой АҚШда Шинжон-Уйғур автоном ҳудудидан товарлар импортини тақиқлашни назарда тутувчи қонун қабул қилингани сабаб кескин норозилик билдирди ва бунга қарши жавоб чораси кўрилишини маълум қилди. Бу ҳақда Хитой ТИВ вакилининг баёнотига таяниб, «Интерфакс» хабар берди.
Оқ уйнинг маълум қилишича, АҚШ президенти Жо Байден Қўшма Штатларга Шинжондан товарлар олиб киришни тақиқловчи ва Шинжон-Уйғур автоном республикасида мажбурий меҳнатга алоқадор алоҳида шахсларга санкциялар жорий этиш тўғрисидаги қонунни имзолаган.
«Хитой бундан қаттиқ ғазабланиб, кескин норозилик билдирмоқда», — дея таъкидлайди Хитой ТИВ вакили.
Баёнотда қайд этилишича, АҚШ «Шинжондаги инсон ҳуқуқлари ҳолатига қасддан туҳмат қилмоқда, халқаро ҳуқуқ ва халқаро муносабатларнинг асосий меъёрларини жиддий равишда бузиб, Хитойнинг ички ишларига қўпол аралашмоқда».
«Хитой вазиятнинг ривожланишидан келиб чиқиб кейинги ҳаракатларни қабул қилади», — дея огоҳлантиради Хитой ташқи сиёсий идораси. Хитой ТИВ вакили Шинжон билан боғлиқ ишлар мамлакатнинг ички ишлари эканини таъкидлаб, миллий суверенитетни ҳимоя қилиш, хавфсизлик ва ривожланиш манфаатларидан оғишмаслигини билдирган.
Аввалроқ АҚШ, Канада ва Буюк Британия Хитойни «уйғурлар геноциди»да айблаб, унга қарши санкциялар киритган эди. Шунингдек, АҚШ уйғурларга қилинаётган зуғумлар сабаб Шинжондан пахта импортини чеклаб қўйган.
Мавзуга доир: Хитой АҚШни савдо қоидаларини бузишда айблади
Изоҳ (0)