Эрон томонидан Форс кўрфазида ўтказилган ҳарбий ўқув машғулотлари Исроил учун огоҳлантириш ҳисобланади. Бу ҳақда Эрон Ислом инқилоби муҳофизлари корпуси (ИИМК) қўмондони, генерал Ҳусайн Саломий Тель-Авив Эрон ядро объектларига ҳужум уюштиришни режалаштирган бўлиши мумкинлиги борасидаги хатар фонида маълум қилди, деб ёзади «Интерфакс».
«Ушбу ўқув машғулотларида аниқ хабар бор: жиддий, реал… Бу сионист режим ҳукуматига хатар борасида огоҳлантириш эди», — дейди Саломий давлат телевидениеси эфирида.
Шунингдек, Эрон генерали Исроилга «хатолардан эҳтиёт бўлишни» маслаҳат берган.
«Улар нотўғри қадам ташласа, қўлларини кесамиз… Ҳақиқий операциялар ва ҳарбий ўқув машғулотлари орасида фарқ — бу ракеталарни учириш бурчагини ўзгартиришда холос», — дея қўшимча қилган Саломий.
Ҳарбий машғулотлар давомида Теҳрон уруш ҳолатида АҚШ ва бошқа душманларига қарши муҳим тўхтатувчи ва «қасос олувчи куч» деб биладиган баллистик ва қанотли ракеталар синовдан ўтказилган. Эрон телевидениеси ракеталар ёрдамида ташқи кўриниши Исроилнинг Димона шаҳридаги ядровий реакторига ўхшаш объектларнинг яксон қилиниши намойиш этган.
Эроннинг Tasnim ахборот агентлиги «ракета машғулотлари давомида сионистик режимнинг муҳим марказига ҳужум муваффақиятли амалга оширилгани»ни маълум қилди. Эрон ўзининг баллистик ракеталари 2 минг километргача уча олишини ва Исроил ҳамда АҚШ ҳудудидаги объектларни яксон этишга қодирлигини билдирган.
«Буюк пайғамбар 17» номи остида ўтказилган беш кунлик ўқув машғулотлари Форс кўрфази қирғоқларида 20 декабрь куни бошланганди. Унда қуруқликдаги, ҳарбий денгиз ва ҳаво кучлари иштирок этди.
Аввалроқ АҚШ ҳарбий денгиз кучлари Эрондан ноқонуний олиб келинаётган қуролларни қўлга олгани, БМТ Эрон ядро дастури бўйича музокара иштирокчиларини ўз саъй-ҳаракатларини икки баравар оширишга чақиргани тўғрисида хабар берилганди.
Изоҳ (0)