Мексикада 95 минг киши бедарак йўқолгани, 52 минг номаълум жасад оммавий қабрларга кўмилгани қайд этилган. Бу ҳақда Deutsche Welle хабар берди.
Нашрнинг ёзишича, Мексика ҳукумати бедарак йўқолганлар муаммоси билан шуғулланадиган Одамларни идентификациялаш миллий марказини очишга ваъда берган.
«Одамларни идентификациялаш миллий марказининг ташкил этилиши бу борадаги камчиликларни бартараф этиш, оммавий идентификация қилиш механизмларини яратишга қаратилган», — дейилади ҳукумат баёнотида.
Мексика ички ишлар вазирининг инсон ҳуқуқлари бўйича ёрдамчиси Алехандро Энсинас мамлакатдаги совуқ камераларда 9400 та номаълум жасад борлигини қўшимча қилди.
«Суд-тиббиёт соҳасида инқироз мавжуд, бу эса одамларнинг шахсини аниқлаш ва уларнинг оилаларига қайтишини кафолатлай олмайдиган вазиятга олиб келди», — деди вазир.
Ҳисоботда Энсинас Мексика ҳукумати мамлакатда инсон ҳуқуқларининг бузилиши давом этаётганини тан олишини таъкидлаб, ҳукуматнинг муваффақиятсизликлари туфайли вазият ёмонлашганини қўшимча қилди. Вазир томонидан эълон қилинган чора-тадбирлар орасида Мексикани ҳимоя қилиш дастурининг бенефициарлари сонини 88 фоизга кўпайтириш ҳам бор.
Қайд этилишича, айни пайтда Мексикада бутун мамлакат бўйлаб 2011 нафар ҳуқуқ ҳимоячиси ва 495 нафар журналистни ҳимоя қилиш ташаббуси амал қилмоқда. Мамлакат президенти Лопес Обрадор лавозимга келган 2018 йилнинг декабридан бери расмий маълумотларга кўра, Мексикада 96 нафар фаол, 47 нафар журналист ва ОАВ ходимлари ўлдирилган. Энсинаснинг сўзларига кўра, журналистларга қарши жиноятларнинг 90 фоизи жазосиз қолмоқда.
Изоҳ (0)