«Толибон» ўз сафида ҳаракатни обрўсизлантирган 2 мингга яқин кишини аниқлади

Афғонистонда «Толибон» ҳаракати томонидан тузилган Тозалаш комиссияси ҳаракат аъзолари орасидан толибларнинг обрўсини тўккан 1895 кишини аниқлади. Бу ҳақда «Толибон» матбуот котиби Иномулла Саманганий Twitter’даги саҳифасида маълум қилди.

Тозалаш комиссияси «Толибон» томонидан бир ой олдин тузилган. Ҳаракат шу тариқа афғонистонликларнинг «Толибон» жангариларининг репрессиялари ва ўзбошимчаликлари ҳақидаги кўплаб шикоят ва хабарларига жавоб қайтарган.

Ушбу комиссия ҳаракатнинг марҳум асосчиси мулла Умарнинг ўғли мулла Муҳаммад Ёқуб бошчилигидаги «Толибон» Мудофаа вазирлигига бўйсунади. Унинг асосий вазифаси сафда ўз ҳаракатлари билан толибларни «ёмонотлиқ қилаётган» шахсларни аниқлашдан иборат.

Саманганийнинг таъкидлашича, бир ой давомида аниқланган «зараркунандалар»нинг бир қисми ҳибсга олиниб, уларнинг ишлари судга юборилган.

Шунингдек, Afghanistan.ru Саманганийга таяниб, хабар беришича, «Толибон» муваққат маъмурияти раҳбари ўринбосари мавлавий Абдул Кабир афғон сикхлари ва индуистлари вакиллари билан учрашув ўтказган.

У Афғонистонни барча «афғонлар учун умумий уй» деб атаган ва мамлакатнинг янги ҳукумати барча этник озчиликлар хавфсизлигини таъминлашига кафолат берган. «Мамлакатдаги барча этник гуруҳлар ва фуқаролар хавфсизликда яшаш ҳамда давлат тараққиётига ҳисса қўшиш ҳуқуқига эга», — деган мавлавий Абдул Кабир.

Ўз навбатида, сикхлар ва индуистлар вакиллари Афғонистонни ривожлантиришда доим иштирок этиб келганини ва бундан кейин ҳам конструктив рол ўйнашга тайёрлигини айтиб, улардан тортиб олинган ерларни қайтаришни сўраган.

Бундан аввал «Толибон» Афғонистондаги ҳазоралар жамоаси вакиллари билан ҳам учрашиб, уларнинг хавфсизлигини таъминлашга ваъда берганди.

Афғонистонда толиблар у ёки бу шаклда ҳокимиятга қайтиши маълум бўлган сўнгги икки йил ичида ҳаракатнинг сафи кенгайган. Жорий йилнинг август ойи ўрталарида Кобул босиб олинганида, «Толибон» жангарилари сони 100 минг кишига етганди.

Афғонистонда ҳокимиятни қўлга киритганидан сўнг, юқори мартабали «Толибон» амалдорлари ағдарилган ҳукуматнинг собиқ амалдорлари ва хавфсизлик кучларига қарши репрессия уюштирмасликка ишонтирган эди. Бироқ ижтимоий тармоқларда собиқ ҳукуматга ишлаган ёки Афғонистонда 20 йил бўлган хорижий қўшинлар билан ҳамкорлик қилган афғонларнинг ҳибсга олингани ва ўлдирилгани ҳақида мунтазам хабарлар пайдо бўлмоқда. Журналистлар ва фуқаролик фаолларига нисбатан ҳам репрессиялар амалга оширилаётгани айтилмоқда.

Одатда, «Толибон» расмийлари ҳаракат аъзоларининг бундай воқеаларга алоқадорлигини рад этади ёки тергов қилишга ваъда бериб, амалда натижа кўрсатмайди. Бундан ташқари, жойларда толиблар ўз қариндошларига уй-жой бериш мақсадида, пуштун бўлмаган этник гуруҳлар вакилларининг мол-мулкни тортиб олаётгани ёки мажбуран уйидан чиқариб юбораётгани ҳақида хабарлар тарқалган.