Афғонистонда ҳокимиятни қўлга киритган «Толибон» мунтазам қуролли кучларни шакллантириш учун махсус комиссия тузди. Бу ҳақда 9 декабрь куни «Толибон» Мудофаа вазирлигининг матбуот марказига таяниб, «Интерфакс» хабар берди.
«Миллий мудофаа вазирлиги раҳбарлигида Афғонистон миллий армиясини шакллантириш бўйича фойдали ва самарали режаларни тақдим этиш учун бугун расман 20 кишидан иборат ишчи қўмита ташкил этилди», — дейилади хабарда.
«Ушбу 20 кишидан иборат қўмита мамлакат халқининг хавфсизлиги ва осойишталигини таъминлаш мақсадида Мудофаа вазирлиги таркибида ҳукумат ва исломий тизим эҳтиёжларидан келиб чиққан ҳолда, имкон қадар қисқа вақт ичида фидойи, интизомли, қуролланган, ҳалол ва масъулиятли армияни шакллантиришга масъулдир», — дея хабар беради ҳарбий бошқарма матбуот маркази.
Хабарга кўра, 9 декабрь куни Миллий мудофаа вазири вазифасини бажарувчи мавлавий Муҳаммад Ёқуб Мужоҳид Мудофаа вазирлиги раҳбариятининг биринчи йиғилишини ўтказган, унда армия корпусининг командирлари иштирок этган.
«Мудофаа вазирлиги раҳбари корпус раҳбарятининг ишларни жадаллаштириш, бригада ва ҳарбий қисмларни шакллантиришни фаоллаштириш, чегараларни назорат қилиш ва қўриқлаш, хавфсизликни янада илғор усуллар билан таъминлаш бўйича ҳисобот ва таклифларини эшитиб, зарур кўрсатмалар берди», — дейилади матбуот марказининг хабарида.
Шу куни Мудофаа вазирлигида «Толибон» Қуролли Кучлари бош штаби бошлиғи Қори Фассиҳуддин Фитрат ҳарбий-ҳаво кучлари бош қўмондони Мавлавий Омонуддин Мансурни шахсий таркибга расман таништирган.
«Хорижга чиқиб кетган ҳарбий ҳаво кучлари учувчилари ва экипажлари ўз уйларига ва ўз вазифаларига қайтиши, ўз тизими ва мамлакатини қуришда иштирок этиши мумкин, чунки улар учун ҳеч қандай хавф йўқ», — дея штаб бошлиғининг сўзларидан иқтибос келтирилган ҳарбий бошқарма сайтида.
Аввалроқ «Толибон» Афғонистон собиқ ҳукуматининг ҳарбийлари ва амалдорларига нисбатан зўравонлик қилган барчани, жумладан, жангариларни ҳам қаттиқ жазолашини эълон қилганди.
«Мужоҳидлар амнистия тўғрисидаги фармонни бажаришга тўла содиқдир, собиқ маъмурият амалдорлари («Толибон»га нисбатан) аввалги қаршиликлари туфайли таъқиб қилинмайди», — дея маълум қилган «Толибон» ташқи ишлар вазирлиги матбуот котиби Абдулқаҳҳор Балхий.
Изоҳ (0)