Хитой Афғонистонга 800 минг дозада коронавирусга қарши вакцина етказиб берди, деб ёзмоқда «Afghanistan.ru».
Вакциналар партиясини топшириш маросимида Хитойнинг Кобулдаги элчиси Ван Ю ва Афғонистон соғлиқни сақлаш вазири вазифасини бажарувчи Абдул Бари Умар иштирок этди.
Хитой дипломатининг таъкидлашича, Пекин Кобулга 3 миллион дозада COVID вакцинасини етказиб беришни режалаштирган. Шунингдек, Хитой афғонларга тиббий асбоб-ускуналар, озиқ-овқат ва қишки кийим-кечаклар етказиб бермоқчи, деди у.
2021 йилнинг июнь ойида ҳам Хитой Афғонистонга 700 минг доза вакцина совға қилганди.
Расмий статистик маълумотларга кўра, шу кунгача Афғонистонда 150 мингдан ортиқ одам коронавирус билан касалланган, улардан 7 минг нафари вафот этган, 140 минг нафари тузалиб кетган. Шунга қарамай, норасмий маълумотларда касалланганлар сони анча юқори экани қайд этилган.
Бу орада Халқаро Олимпия қўмитаси (ХОҚ) ҳам Афғонистоннинг Олимпиада ва Паралимпия ҳамжамиятларига инсонпарварлик ёрдами учун 560 минг доллар ажратишини эълон қилди.
ХОҚ раҳбари Томас Бахнинг айтишича, «Толибон» афғонистонлик спортчилар учун ёрдам олишга рози бўлган. Унинг сўзларига кўра, маблағлар Бирлашган Миллатлар Ташкилотининг Қочқинлаш иши бўйича олий комиссарлиги орқали ўтказилади.
Шунингдек, Бах бугунги кунгача ХОҚ кўмагида Афғонистондан 300 га яқин спортчи эвакуация қилингани ва бу жараён давом этаётганини қўшимча қилди.
Афғонистонда «Толибон» ҳокимият тепасига келгач, кўплаб афғон спортчилари қўллаб-қувватлаш ва маблағ етишмаслиги сабабли фаолиятини якунлашга мажбур бўлган. Афғонистон айни пайтда жиддий гуманитар инқирозга юз тутмоқда. Мамлакатда миллионлаб одамлар очлик ёқасида, озиқ-овқат, дори-дармон ва бошқа зарур маҳсулотлар етишмовчилиги ҳукм сурмоқда.
Изоҳ (0)