Путин меҳнат муҳожирлари рус тили ва Россия қонунларини ўз ватанида ўрганиб келиши зарурлиги ҳақида гапирди

Россия президенти Владимир Путин мамлакатдаги меҳнат муҳожирлари билан боғлиқ вазиятга изоҳ берди, деб ёзади Nuz.uz.

Фуқаролик жамиятини ривожлантириш ва инсон ҳуқуқлари бўйича кенгаш йиғилишида Путин кенгаш раиси Валерий Фадеевнинг иқтисодиётда муҳожирларга эҳтиёж борлиги ҳақида маълумотлар етарли эмас, деган мазмундаги гапларига жавоб қайтарди.

Россия президентининг сўзларига кўра, буни мутлақо тўғри деб бўлмайди — бундай маълумотларни ўз ичига олган ҳисоботлар бош вазир ўринбосари Марат Хуснуллин томонидан мунтазам равишда тақдим этилади. Шу билан бирга, қурилиш мажмуасининг хорижий ишчи кучига бўлган эҳтиёжига алоҳида эътибор қаратилмоқда.

«Аммо бу борада ўз хавотирларини билдираётганларнинг фикрига тўлиқ қўшиламан. Бу масалада МДҲдаги ҳамкасбларимиз билан ҳамкорликда иш олиб боришимиз керак. Бизга келиб ишлашни истовчилар мамлакатимизга келишга ва бу ерда ишлашга ўз ватанидаёқ тайёргарлик кўриши, рус тилини, қонунларимизни ўрганиши, ўз ҳуқуқларини билишини, Россия Федерациясининг қонун-қоидаларига, урф-одатларимизга риоя қилиш бўйича жамоат ташкилотларимиз ва давлат органларимиз уларга қандай йўналиш беришидан (муҳожирларнинг) хабардор бўлишини таъминлаш зарур», — деди Путин.

Россия президентининг таъкидлашича, бу борада у Ҳамдўстлик мамлакатларидаги ҳамкасблари билан доимий музокаралар олиб бормоқда, Ўзбекистон президенти Шавкат Мирзиёев ҳозирданоқ лойиҳага кўмаклашишга тайёрлигини билдирган. Тожикистон, Қирғизистон ва Қозоғистон билан ҳам шундай ҳамкорлик йўлга қўйилган.

«Аммо бу ушбу масалага оид ҳамма нарса тугалланган дегани эмас, аксинча, бу фақат бошланиши», — деди Владимир Путин.

Август ойида Россияда муҳожирлар учун рус тилидан имтиҳон ўтказишнинг янги қоидалари жорий этилганди. Унга кўра, муҳожирлар энди рус тили, Россия тарихи ва қонунчилиги бўйича имтиҳонларда бериладиган тахминий саволларни олдиндан билиб олиши мумкин. Имтиҳонлар ёзма бўлади, лекин Россияда узоқ вақт қолишни истаганлар рус тилида мулоқот қилиш қобилиятини кўрсатиши керак.

Аввалроқ Путин Россияга келган меҳнат муҳожирларини мажбурий дактилоскопик (бармоқ излари билан) рўйхатдан ўтказиш тўғрисидаги қонунни имзолаганди. Шунингдек, эндиликда Россияда оммавий муштлашувларда қатнашадиган муҳожирлар мамлакатдан чиқариб юборилади.