Мексиканинг Чияпас штатида 9 декабрь куни юздан ортиқ муҳожирни олиб кетаётган тиркамали юк машинаси ҳалокатга учради. Дастлабки маълумотларга кўра, 54 киши ҳалок бўлган, дея хабар берди Noticias MVS радиостанцияси.
Радио маълумотларига кўра, кўпчилиги Гватемала аҳолиси бўлган ноқонуний муҳожирларни ташиётган юк машинаси йўл четидаги деворга урилиб, ағдарилиб кетган. Қурбонлардан ташқари яна 58 киши касалхонага ётқизилган, уч нафарининг аҳволи ўта оғир деб баҳоланмоқда.
Шу билан бирга, қутқарув хизматлари фожиага иккита юк машинасининг тўқнашуви сабаб бўлганини, шундан сўнг улардан бири деворга урилганини маълум қилди. Ҳодиса тафсилотлари аниқланмоқда.
Мексика президенти Андрес Мануэль Лопес мамлакат жанубидаги ушбу йирик аварияга муносабат билдирди. Давлат раҳбари жабрланганлар учун барча зарур ёрдам кўрсатилишини айтди.
«Давлат раҳбарининг топшириғига кўра, фуқаро мудофааси кучларининг миллий координатори Лаура Веласкес ва ишчи гуруҳ муҳожирлар иштирокидаги автоҳалокат натижасида юзага келган фавқулодда вазиятни бартараф этиш учун Чияпасга жўнаб кетди», — дея президент матбуот хизматидан иқтибос келтиради ОАВ.
Ноябрь охирида Болгарияда сайёҳлик автобуси ЙТҲга учраб, ёниб кетган эди. Оқибатда 46 киши ҳалок бўлган.
Июль ойида Туркияда ноқонуний муҳожирлар ўтирган микроавтобус ҳалокатга учраганди. Оқибатда 12 киши ҳалок бўлиб, 20 киши жабрланган. Августда эса Перудаги Анд тоғларида автобус жарликка қулаб тушганди. Оқибатда 15 киши ҳалок бўлган, уч киши яраланган.
Изоҳ (0)