Ўзбекистон Сенатининг Мудофаа ва хавфсизлик масалалари қўмитаси аъзолари 23 ноябрь куни Фарғона вилоятининг барча ҳудудларида газ-баллон билан жиҳозланган автомобиллар хавфсизлигини таъминлаш бўйича кўрилаётган чораларни ўрганиб чиққан, 24 ноябрда эса вилоятдаги аҳвол ва кўрилаётган чоралар муҳокамасига бағишланган йиғилиш ўтказган.

Сенатор Толибжон Мадумаров Фарғона вилоятида газ-баллон ўрнатилган автомобилларнинг техник ҳолатини кўздан кечирмоқда, 2021 йил 23 ноябрь.

Фото: Сенат ахборот хизмати

Йиғилишда, жумладан, Фарғона вилоятида жисмоний шахсларга тегишли 341 820 та автотранспорт воситасининг 249 664 таси (73 фоизи) ва 31 814 та юк ташиш учун мўлжалланган транспорт воситаларининг 29 214 таси (91,7 фоизи) газ баллон билан жиҳозлангани маълум қилинган. Айни вақтда «олиб борилган ишлар билан бир қаторда баъзи камчилик ва муаммолар борлиги ҳам кўрсатиб ўтилган». Масалан, «газ баллонларига ортиқча босимда газ тўлдирилиб, яроқлилик муддати 15 йилдан ортиқ бўлган газ баллонларидан ҳам фойдаланиш ҳолатлари кўпайиб бормоқда».

Сенатнинг Мудофаа ва хавфсизлик қўмитаси раиси Қутбиддин Бурҳонов Фарғона шаҳрида газ-баллон ўрнатилган автомобиллар масаласига бағишланган муҳокамада нутқ сўзламоқда, 2021 йил 24 ноябрь.

Фото: Сенат ахборот хизмати

«Жумладан, 2020 йил ва жорий йилнинг 10 ойи давомида республика бўйича газ баллонлари ўрнатилган транспорт воситаларида 17 та портлаш ҳолати содир бўлган ва уларнинг биттаси айнан Фарғона вилоятида қайд этилган», — дейилади Сенат ахборот хизмати хабарида. Айнан мана шу нуқтада ноаниқлик бор — Ўзбекистонда сўнгги бир йилнинг ўзида газ-баллонли автомобиллар портлаши билан боғлиқ камида 17 та ҳолат юз берган (Сенат ахборот хизмати ушбу рақам Бош прокуратурадан олинганини билдирди).

Декабрдан декабргача — жами 17 та ҳолат

2021 йил 1 январдан то бугун (7 декабрь)гача газ-баллон ўрнатилган автомобилларнинг портлаши билан боғлиқ камида 16 та ҳолат ОАВда ёритилган (август ойида Наманганнинг Учқўрғон туманидаги ноаниқ қолган ҳолат ҳам — аввал ёнғин чиқиб, сўнг автомобилдаги газ-баллон портлаганми ё газ-баллон портлагач юз бергач, ёнғин келиб чиққанми — ҳисобга олинса, 2021 йилнинг ўзида 17 та ҳолат юз берган бўлиб чиқади).

Жумладан, 25 январь куни Тошкентнинг Мирзо Улуғбек туманида газ-баллон ўрнатилган Nexia, 27 март куни Сирдарёнинг Гулистон шаҳрида Damas портлаган. 13 апрель куни Жиззах шаҳрида юриб кетаётган чиқинди ташувчи Isuzu юк машинасининг газ баллони портлаши оқибатида йўл четида турган ота-бола тан жароҳати олган (охир-оқибат боланинг оёғи кесиб ташланган). 22 апрель куни Қашқадарёнинг Қарши туманида газ-заправкадаги Nexia’нинг газ-баллони портлаб кетиши оқибатида бир киши ҳалок бўлган, газ-заправканинг бир ходими жароҳатланган.

Чироқчи туманида 22 май куни ҳаракатланиб кетаётган Nexia’нинг газ-баллон портлаши оқибатида икки киши ҳалок бўлган, автомобилнинг ўзи эса мутлақо яроқсиз аҳволга келган эди.

Фото: Telegram

22 май куни иккита бахтсиз ҳодиса қайд этилган — бири, сенаторлар таъкидлаганидек, Фарғона вилоятида, иккинчиси эса Қашқадарёда. Қувада газ тўлдираётган «Жигули»нинг газ-баллони портлаши оқибатида машинанинг 32 ёшли ҳайдовчи ва машина яқинида турган яна бир 58 ёшли фуқаро жароҳатланган. Чироқчида эса юриб кетаётган Nexia’нинг газ-баллони портлаб, икки кишининг умрига зомин бўлган, яна бир киши тан жароҳатлари билан касалхонага ётқизилган.

1 июнь куни одамлар ўлимига сабаб бўлган яна бир ҳодиса Сирдарё вилоятининг Оқолтин туманида юз берган — йўлда ҳаракатланиб кетаётган Lacetti’нинг газ баллони ёрилиб кетиши оқибатида икки киши ҳалок бўлган, яна икки киши тан жароҳатлари билан касалхонага ётқизилган. 9 июнь куни Самарқанд шаҳридаги газ-заправкада Nexia автомобилининг баллони портлаб кетган (жабрланганлар йўқ). 28 июль куни шунга ўхшаш воқеа Сурхондарёнинг Музработ туманидаги газ-заправкада УАЗ автомобили билан содир бўлган.

Сирдарёнинг Оқолтин туманида 1 июнь куни ҳаракатланиб кетаётган Lacetti’нинг газ-баллон ускунаси портлаши оқибатида икки йўловчи воқеа жойида ҳалок бўлган, ҳайдовчи ва яна бир йўловчи турли тан жароҳатлари билан шифохонага ётқизилган эди.

Фото: Telegram / @Sirdaryo

8 сентябрь куни Жиззахнинг Шароф Рашидов туманида «Газель» юк машинаси газ-баллони портлаган, бир киши жароҳатланган. 29 сентябрь куни Қашқадарёнинг Ғузор туманидаги газ-баллонли Lacetti портлаган, бир киши тан жароҳати олган. 2 октябрь куни Сурхондарёнинг Жарқўрғон туманидаги газ-заправкада Lacetti автомобили портлаб кетган. 14 октябрда Бухорода юк машинасига айлантирилган газ-баллонли «Волга» портлагани ҳақида хабар берилган.

27 октябрь ва 4 ноябрь кунлари Қашқадарёнинг Чироқчи туманида газ-баллон ўрнатилган Nexia’лар иштирокида портлашлар юз берган (жами тўрт киши тан жароҳати олган). 18 ноябрь куни Қорақалпоғистоннинг Қораўзак туманидаги газ-заправкада Matiz автомобили портлаб кетган, уч киши тан жароҳати олган. Шундай қилиб, автомобилларда газ-баллон портлаши билан боғлиқ 2021 йилнинг ўзида юз берган камида 16 та ҳодиса оқибатида дастлабки маълумотлар бўйича 7 киши ҳалок бўлган, 17 киши тан жароҳати олган.

Бухоро вилоятида 2020 йил 20 март куни Nexia-3 автомобилига ўрнатилган газ баллонининг портлаши оқибатида 50 ва 24 ёшли икки аёл ва 3 ёшли болакай ҳалок бўлган эди.

Фото: ИИВ ҳузуридаги Тергов департаменти

Агар бундай бахтсиз ҳолатлар ҳисоб-китобини 2020 йил декабрь ойидан бошласа, портлашлар сони 17 тани ташкил этади — 22 декабрь оқшомида Бухоро шаҳрида ҳаракатланиб кетаётган «Жигули» автомобилидаги газ-баллон портлаб кетган, ҳайдовчи тан жароҳати олган. Бундан ташқари 2020 йилда яна камида тўртта (Сирдарёда битта, Андижонда битта, Бухорода иккита) портлаш юз берган. Хусусан, 20 март куни Бухорода Nexia-3 автомобилига ўрнатилган газ-баллон портлаши оқибатида уч киши ҳалок бўлган — 2020—2021 йилларда юз берган ва жамоатчиликка ошкор қилинган бошқа бирор ҳолатда бу қадар кўп қурбон бўлмаган.