Жиззахда маҳкум ўзини Президент Администрацияси ходими деб таништириб, жиноят содир этди

Жиззах вилоятида бир неча қонунбузарликлари учун озодликдан маҳрум қилинган маҳкум яна жиноят содир этди, деб хабар бермоқда Ички ишлар вазирлиги.

Маълум қилинишича, Тошкент вилояти Чирчиқ шаҳридан бўлган, бир неча қонунбузарликларни содир этгани учун маъмурий жарима, ахлоқ тузатиш, озодликни чеклаш жазо чоралари тайинланган маҳкум Т.Т. сўнгги марта 2020 йил 24 август куни Чирчиқ шаҳар суди томонидан Жиноят кодексининг 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан 4 йилу 6 ой муддатга озодликдан маҳрум қилинган.

Қайд этилишича, унга жазо муддатини Жиззах вилоятидаги 31-сон манзил колониясида ўташ тайинланган. Жазони ўтаётган 28 ёшли маҳкум Қашқадарё вилояти электр тармоқлари корхонаси бошлиғига телефон қилиб, ўзини Президент Администрацияси масъул ходими деб таништирган.

«Сизнинг олдингизга менинг номимдан бир ишсиз фуқаро келади. Уни иш билан таъминлашда амалий ёрдам кўрсацангиз дегандим, деб телефон қилдим. Ўзимни амалдор кўрсатиб, ёлғон сўзлаб, нотўғри ҳаракат қилиб қўйдим. Чин юракдан пушаймонман», — деган маҳкум.

Таъкидланишича, у ИИВ ҳузуридаги Жазони ижро этиш департаменти ва бошқа ҳуқуқни муҳофаза қилувчи органлар билан ўтказилган тезкор тадбирда далилий ашёлар билан қўлга олинган.

Жиноят-ижроия кодекси 120-моддасига (махсус тартибли колонияларда жазони ўташ тартиби) мувофиқ, у ашаддий тартиббузар деб топилиб, унга нисбатан жазосининг ўталмай қолган қисмини манзил колониядан умумий тартибдаги колонияга кўчириш жазоси қўлланилган. Ҳозирда ҳолат юзасидан прокуратура органлари томонидан терговга қадар текширув ҳаракатлари олиб борилмоқда.