Қашқадарё вилоятининг айрим ҳудудларида кам даромадли оилаларни қўллаб-қувватлаш мақсадида қуриб берилган иссиқхоналар ҳеч қанча вақт ўтмай қулаб тушган, аҳоли эса бирор фойда келтирмаган иссиқхона учун кредит тўловларини амалга оширишга мажбур бўлмоқда.
Нишон туманидаги Таллимаржон шаҳарчасида яшовчи Комил Бекмуродов «Дарё» мухбири билан суҳбатда маълум қилишича, 2019 йил баҳорида у ва бошқа маҳалладошлари ҳокимликка чақирилиб, уларга «аҳолини бой қилиш мақсадида имтиёзли тарзда иссиқхоналар қуриб берилаётгани» айтилган. Шундан сўнг у ҳам ўша вақтда вақтинча ишсиз бўлган рафиқаси номига 15 миллион сўмлик кредитни уч йил муддатга олиб, иссиқхона қурилишига рози бўлган.
Унинг таъкидлашича, иссиқхона бошидан сифатсиз қурилган. У бу ҳолат устидан масъулларга шикоят қилганида иссиқхонани қуриб бераётган «Нишон юлдузи томорқа хизмати» компанияси вакиллари: «Оилангиз номига кредит чиқиб кетган, илтимос, ишни ортга сурманг, сифатли қилиб топширамиз», деб ваъда берган. «Иссиқхона талабга жавоб берса бўлди, дея уларнинг илтимосига хўп дедим. Афсуски, 2020 йил ноябрь—декабрь ойида қуриб битказилган иссиқхоналар ўша йил 26—27 декабрь кунлари ёғган қор оқибатида қулаб тушди», — дейди Комил Бекмуродов.
Оила бошлиғи ҳодиса юз берган вақтдаёқ туман ҳокимлиги, ИИБ ва прокуратурасига мурожаат қилган. Дастлаб маҳалла раиси бошчилигидаги ишчи гуруҳ келиб, вазиятни ўрганган ва Бекмуродовдан ташқари яна 12 та хонадонга қуриб берилган иссиқхоналар яроқсизлиги, аҳоли ундан даромад ололмаётгани ҳақида далолатнома тузган. Нишон тумани ҳокими Мухтор Ҳайитмуродов эса 2021 йил февраль—март ойларида йўллаган жавоб хатларида фуқаронинг иссиқхоналар яроқсиз чиққани юзасидан судга мурожаат қилиши мумкинлигини тушунтирган.
Туман прокурори Хидир Каримов имзоси 2021 йилнинг 27 апрель куни чиқарилган хатда «Нишон юлдузи томорқа хизмати» компанияси мансабдори Ғ.П.га ўзига ишониб топширилган ўзганинг маблағларини ишлатиб юбориб, бюджет маблағларини ўзлаштириш ва растрата қилиш йўли билан талон-торож қилганликда айбланаётгани, ушбу ҳолатлар юзасидан 2021 йил 15 март куни жиноят иши қўзғатилгани, фуқаронинг шикояти ҳам шу жиноят ишига қўшилган ҳолда ўрганилаётгани таъкидланган. Аммо прокурорнинг 2021 йил 11 октябрдаги жавоб хатида иссиқхона қуриб берувчилар иши туман ИИБ томонидан 2021 йил сентябрь ойида ёпилган.
Фуқаро Бекмуродов март ойида мавжуд бўлган жиноят аломатлари қандай қилиб сентябрь ойига келиб йўқ бўлиб қолгани, иш қандай қилиб ёпиб юборилганини тушунолмай ҳайрон. «Биз бой бўламиз деб иссиқхона қурдириб, бор-будимизни ҳам шу натижасиз кредитга сарфлашга мажбур бўляпмиз», — дейди фуқаро.
Нишон тумани ҳокимлиги ахборот хизматидан «Дарё»га маълум қилишларича, юқорида зикр этилган муаммо ечими билан туман ҳокимлиги ва туман Халқ қабулхонаси шуғулланмоқда ва тез орада муаммо ечими ҳақида батафсил маълумот берилади.
Саид Таваккалов нафақат туман, балки вилоят ташкилотларига ҳам шикоят қилиб борган, «аммо натижа йўқ». «Иссиқхона талабга жавоб бермайди. Барча экинларимизга куйдик. Туман прокуратурасига мурожаат қилдик — келишмади. Вилоят ташкилотларига ҳам мурожаат қилдик, аммо ҳеч қандай натижа йўқ», — деди отахон «Дарё» мухбири билан суҳбатда.
Мазкур муаммо билан боғлиқ маълумотлар бир муддат аввал ижтимоий тармоқларда эълон қилинган эди. Шундан сўнг Китоб тумани ҳокимлиги ва ушбу оилага иссиқхонани қуриб берган «Китоб юқори дарвоза» компанияси вакиллари шикоят эгаларининг хонадонида бўлган.
«Таъминотчи компания раҳбарияти айбини тан олди ва фуқарога иссиқхона учун 25 миллион сўм кредитни ўз ҳисобидан тўлайдиган, шунингдек, фуқаронинг 2 миллион сўмлик зарарини ҳам қоплайдиган бўлди», — деди Китоб тумани ҳокимлиги матбуот котиби Қаҳрамонжон Оқилов.
Изоҳ (0)