Жанубий Африкадан Россияга келган икки кишида коронавируснинг «омикрон» штамми аниқланди. Бу ҳақда «Роспотребнадзор»га таяниб, Meduza хабар берди.

Фото: Getty Images

«Карантин биносига жойлаштирилган куниёқ ПЗР-тести ижобий чиққан икки беморда ‘Роспотребнадзор’ Марказий эпидемиология илмий-тадқиқот институти томонидан ўтказилган геном бўйича секвенлаш натижасида ‘омикрон’ штамми тасдиқланди», — дейилади муассаса хабарида.

«Роспотребнадзор» маълумотларига кўра, Россияга Жанубий Африка ва қўшни давлатлардан келган 10 кишида коронавирус аниқланган, аммо уларда айнан қандай штамм борлиги ҳозирда текширилмоқда. Ташриф буюрувчиларнинг ҳаммаси карантиндан ўтиш учун мўлжалланган бинога юборилган.

Аввалроқ 4 декабрь куни Кейптаундан Москвага келган россиялик фуқаро Юлия Демина мамлакатга қайтгач, йўталиб, иситмаси кўтарилганини маълум қилган. Тиббий ёрдам ходимлари унга «‘омикрон’ юқтирган бўлиши мумкин»лигини айтган. Бу ҳақда расмий изоҳ берилмаган.

Коронавируснинг янги «омикрон» штамми биринчи марта 11 ноябрь куни Жанубий Африкада топилган. Россияда 2 декабрдан бошлаб Жанубий Африка ва унга қўшни давлатлардан қайтганларнинг барчаси учун икки ҳафталик карантин жорий этилди.

Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.

Кейинроқ Бирлашган Миллатлар Ташкилоти янги штамм туфайли мамлакатлараро ҳаракатланишга қўйилаётган тақиқларни самарасиз ва адолатсиз деб атади.

Очиқ манбалардан олинган маълумотларга кўра, «омикрон» штамми 45 дан ортиқ мамлакат ва ҳудудларда қайд этилган.