Mamlakatlararo harakatlanishga qo‘yilayotgan cheklovlar diskriminatsiya xususiyatiga ega va pandemiyaga qarshi kurashda samara bermaydi. Bu haqda Birlashgan Millatlar Tashkilotining bosh kotibi Antoniu Guterrish aytib o‘tdi, deb yozadi Reuters.
Foto: EPA
“Bizda sayohat xavfsizligini ta’minlashga qaratilgan mexanizmlar mavjud. Keling, ushbu vositalardan foydalanaylik-da, sayohatda nomaqbul bo‘lgan ayirmachilikdan qochaylik”, — dedi Guterrish.
Bosh kotibning ta’kidlashicha, ma’lum bir mamlakat yoki mintaqani izolyatsiya qiluvchi cheklovlar “nafaqat o‘ta adolatsiz va og‘ir, balki samarasiz hamdir”.
U infeksiya xavfini kamaytirish va iqtisodiy munosabatlarni saqlab qolishning yagona yo‘li sayohatchilarni doimiy ravishda tekshirish va isbotlangan chora-tadbirlarni ko‘rish ekanini qo‘shimcha qildi.
Avvalroq Jahon sog‘liqni saqlash tashkiloti bosh direktori Tedros Gebreyesus “omikron” shtammi sabab haddan ortiq jiddiy cheklovlar joriy etilayotganini ma’lum qilgandi. JSST rahbarining aytishicha, u bir nechta davlatlar “faktlarga asoslanmagan va samarali bo‘lmagan, aksincha, tengsizlikni kuchaytiradigan umumiy, qo‘pol cheklovlarni joriy etayotganidan” xavotirda.
AQShda noyabr oyida Janubiy Afrikadan qaytgan amerikalik fuqaroda koronavirusning yangi “omikron” shtammi qayd etildi. U mamlakatda koronavirusning mazkur shtammi aniqlangan birinchi fuqaro hisoblanadi.
Koronavirusning yangi shtammi so‘nggi kunlarda 20 dan ortiq mamlakatda qayd etilgan.
Qozog‘iston “omikron” shtammi sabab 3-dekabrdan Afrikaning bir nechta mamlakati va Gonkongdan keladigan fuqarolarning mamlakatga kirishini cheklamoqda. Isroil ushbu shtammning tarqalishining oldini olish maqsadida dunyoda birinchi bo‘lib chet el fuqarolari uchun o‘z chegaralarini yopib qo‘ygan edi.
Saudiya Arabistoni va Maldiv orollari Janubiy Afrika, Namibiya, Botsvana, Zimbabve, Mozambik, Lesoto, Esvatini va yana bir qator davlatlarga borish-kelish reyslarini to‘xtatib qo‘ydi.
Bundan tashqari, Rossiya 28-noyabrdan boshlab Janubiy Afrika, Gonkong, Botsvana, Lesoto, Namibiya, Zimbabve, Mozambik, Madagaskar, Esvatini va Tanzaniyadan keluvchi xorijliklarning mamlakatga kirishini chekladi.
Koronavirusning ko‘p sonli mutatsiyaga ega yangi “omikron” (B.1.1.529) shtammi birinchi marta noyabr oyida Janubiy Afrikada topilgandi. Jahon sog‘liqni saqlash tashkiloti ma’lumotlariga ko‘ra, B.1.1.529 virusi organizmdagi protein tarkibiga ta’sir ko‘rsatishi mumkin. Amaldagi vaksinalar esa bu kabi o‘zgarishlarga yetarlicha samarador bo‘lmasligi aytilmoqda. Shuningdek, JSSTda mavjud dastlabki ma’lumotlarga ko‘ra, ilgari koronavirusni boshdan o‘tkazgan kishilarda “omikron” bilan qayta kasallanish xavfi yuqori bo‘lishi mumkin.
