Микротўлқинли печ энг машҳур маиший электр жиҳозларидан бири саналади. Қисқа муддатда таом тайёрлаш ё иситишдаги қулайлиги сабаб кундалик ҳаётнинг ажралмас бўлагига айланган. «Дарё» унинг яратилиш тарихи ва фойдаланиш билан боғлиқ қизиқ маълумотларни эътиборингизга ҳавола қилади.
Кутилмаган кашфиёт
Микротўлқинли печ тасодифан ихтиро қилинган. Бунинг қандай рўй бергани ҳақида иккита қараш мавжуд. Биринчисига кўра, америкалик муҳандис ва радар бўйича мутахассис Перси Спенсер магнетрон (электронлар оқими магнит майдон билан ўзаро таъсирлашуви натижасида микротўлқинларни ҳосил қилувчи кучли электрон лампа) қаршисида турган вақт чўнтагидаги шоколад бўлаги эриб кетади. Иккинчи қарашга кўра, шоколад ўрнида сендвич бўлган.Иккинчи ҳолат ҳақиқатга анча яқин, чунки магнетрон одамга ҳеч қандай зарар етказмаган ҳолда шоколадни эритиб юборишига ишониш қийин. Нима бўлганда ҳам ихтиро Перси Спенсер томонидан патентланган.
1947 йилда, Raytheon компанияси томонидан ишлаб чиқарилган Radarange модели пайдо бўлган вақтда, бу жиҳоз келажакда ҳар бир хонадонга кириб бориши ҳеч кимнинг хаёлига келмаганди.
Дарвоқе, ўша вақтларда микротўлқинли печлар фақат қуролли кучларда ишлатилган. Radarange 1947 йилда ишлаб чиқарилган бўлса, 1960 йилларгача ундан аскарлар учун овқат иситишда фойдаланилган. Унинг ҳажми ҳозиргилардан бир неча баробар катта эди ва оғирлиги 340 килограммни ташкил қиларди. Илк микротўлқинли печ нархи 3000 доллар атрофида турарди. Маълумотларга таянсак, ўша йиллардаги 3000 доллар ҳозирги 30 000 долларлик қийматдан ошади.
1955 йилнинг 25 октябрида Американинг Таppan бренди остида илк маиший микротўлқинли печ ишлаб чиқарилган. 1962 йилда эса Япониянинг Sharp компанияси томонидан шу мақсадда илк бор серияли ишлаб чиқариш бошланган. Лекин бошда унга талаб унча юқори бўлмаган.
Хавфсизлик борасидаги уйдирмалар
Айримлар микротўлқинли печнинг ўзидан зарарли радиациялар чиқаришига ишонади, лекин бу хато. Унинг зарари Wi-Fi роутерникидан кучли эмас. Бундан ташқари, микротўлқинли печ таомдаги озуқавий моддаларни йўқ қилиб юбориши ҳақидаги қараш ҳам кенг тарқалган. Лекин олимлар буни бир неча бор рад қилган. У таомдаги моддалар таркибини ўзгартирмайди, чунки нурланиш фақат сувга таъсир қилади.Хитойнинг арзон микротўлқинли печлари бирорта таниқли компаниянинг қимматбаҳо маҳсулотидан кўра хавфлироқ, деган фикрга ҳам қўшилиб бўлмайди. Арзон ва қиммат микротўлқинли печларнинг ишлашида катта фарқ йўқ, чунки ишлаш принципи бир хил. Қимматлари, нари борса, пишиқлиги, қўшимча функциялари ва бренди билан фарқланади, холос.
Унда тайёрланган ё иситилган овқат касалликларни келтириб чиқаради, деган қарашнинг уйдирма эканлигини исботлаш ҳам унча қийин эмас. Ундаги микротўлқинли энергия зарарли моддаларни юзага келтириш учун етарли бўла олмайди. Бироқ пластмасса ёки полиэтилен идишлардан фойдаланилса, шундай хавф пайдо бўлиши мумкин.
Фойдаланиш бўйича қизиқ кўрсатмалар
1. Лимонни янада сувлироқ истеъмол қилишни истасангиз, микротўлқинли печга 20 сония қўйиб олинг.2. Печ ёрдамида кўкатларни бир неча дақиқа ичида ҳеч қандай чиқитсиз қуритиб олиш мумкин.
3. Саримсоқ пиёз пўстлоғини тозалашга қийналсангиз, тишчаларини ажратиб, микротўлқинли печга 15 сонияга солиб қўйинг. Шунда анча осонроқ тозаланади.
4. Унинг ёрдамида қаттиқ нонни юмшатиш ҳам мумкин. Бунинг учун нонни ҳўл сочиқ билан ўраб, бир неча марта ўн сония давомида қўйиш керак. Шу тарзда керакли намлик ҳолатига келгунича давом эттиринг.
5. Чипсни сочиққа ўраб, микротўлқинли печда озроқ иситинг. Сочиқ чипсдаги намликни тортиб олади ва у яна қирсилдоқ ҳолига қайтади.
6. Сочиқни микротўлқинли печга, тахминан, бир дақиқа қўйиб, иссиқ компресс сифатида фойдаланишингиз мумкин.
7. Шакар идишига нам сочиқ солиб, қопқоғини ёпинг ва уни 20 сония қиздиринг. Шакар анча майинлашади.
8. Микротўлқинли печни тозалашга қийналсангиз, косага сирка қўшилган сув солиб, беш дақиқа унинг ичига солиб қўйинг. Ичи буғга тўлганидан сўнг овқатдан қолган доғлар битта артишда кетади.
9. Идишнинг микротўлқинли печда ишлатилиши мумкинлигини текшириш учун микротўлқинли печда ишлатиш мумкин бўлган кружкани олинг ва совуқ сув билан тўлдиринг. Кружкани синаб кўрмоқчи бўлган идишингизнинг устига қўйинг ва микротўлқинли печга жойланг. Агар бир дақиқа иситишдан кейин сув илиқ ва идиш совуқ бўлса, уни микротўлқинли печда ишлатиш мумкин. Бироқ идиш иссиқ, лекин сув совуқ бўлса, у идишни микротўлқинли печда бошқа ишлатманг.
10. Шафтоли ва помидор каби меваларни 30 сония давомида микротўлқинли печга қўйсангиз, қобиғини тозалаш анча осон бўлади. Тозалашдан олдин икки дақиқа совутинг.
11. Микротўлқинли печда териси нисбатан қалин бўлган мева ва сабзавотларни узоқ вақт давомида иситиш қўшимча эҳтиёт чораларини талаб қилади. Масалан, картошка, помидор ва қовоқни иситишда эҳтиёт бўлиш керак. Иситишдан аввал бир нечта еридан тешикча очинг. Бундай қилмасангиз қобиғи иссиқликни ушлаб қолиб, ҳатто портлаб кетиши мумкин.
12. Почта маркасини кўчириш учун маркага бир томчи сув томизиш ва уни 20–30 сония давомида иситиш кифоя. Почта маркаси ўз-ўзидан кўчиб кетади!
13. Пиёз тўғрашда кўз ачишиб, ёшланмаслиги учун тўғрашдан аввал учларини кесиб, микротўлқинли печга 30 сония солиб қўйиш керак. Шунда кўз ёшланмайди.
14. Эскирган асални асл ҳолига қайтариш учун қопқоқни очиб, асални икки дақиқа давомида 50 фоизлик қувватда қиздиринг.
15. Микротўлқинли печда балиқ пишириш қийинчилик туғдириши мумкин. Бу борада озроқ маслаҳат бериб ўтсак, зарар қилмайди. Аввало, балиқни яхшилаб қуритинг. Агар балиқ бўлаклари бир нечта бўлса, уларнинг ингичка томонини бир тарафга қаратиб қўйинг. Шунда улар бир хил пишади. Балиқни микротўлқинли печда тўлиқ пишириб юбормаслик керак, чунки у печдан олганингиздан кейин ҳам пишишда давом этади.
16. Ловия ёки ясмиқни тунда сувга солиб қўйишни унутган бўлсангиз, уни идишга солиб, озгина сода қўшинг ва идиш оғзини ёпинг. Идишни микротўлқинли печга ўн дақиқага қўйинг ва кейин тахминан 40 дақиқа тиндиринг. Шунда туни бўйи намлангандай натижага эришасиз.
17. Идишга қайноқ сув қуйинг. Озроқ сирка қўшинг ва идишга тухум чақинг. Сариғини тиш тозалагич билан озгина тешиб, идишни озиқ-овқат плёнкаси билан ёпинг. Сўнгра 30 сония давомида микротўлқинли печга қўйинг. Тухумни айлантиринг ва яна 20 сонияга қўйинг. Ёқимли иштаҳа!
18. Сендвични қоғоз сочиқ билан исицангиз, сочиқлар сендвичдаги ортиқча намликни ўзига шимиб олади.
19. Микротўлқинли печда қиздирилган ёнғоқлар, уруғлар ва зираворлар 15 сония ичида ошхонангизни ёқимли ҳид билан тўлдиради.
20. Микротўлқинли печни тозалашга сирка бўлмаса, бир неча дона қоғоз сочиқни намланг ва беш дақиқа давомида микротўлқинли печга қўйинг. Улар печни буғ билан тўлдиради ва совиганидан сўнг ёғларни тозалаш учун ишлатишингиз мумкин.
21. Тезкор нонушта керакми? Тухум, пишлоқ ва сутни идишга солиб, туз ва мурч қўшинг ва аралашмани бир ярим дақиқа микротўлқинли печга қўйинг. 45 сониядан кейин тухумни аралаштиришни унутманг.
Изоҳ (0)