Kaliforniyada 22-noyabr kuni Janubiy Afrikadan qaytgan amerikalik fuqaroda koronavirusning yangi “omikron” shtammi qayd etildi. U mamlakatda koronavirusning mazkur shtammi aniqlangan birinchi fuqaro hisoblanadi. Bu haqda AQSh Allergik va yuqumli kasalliklar milliy instituti rahbari Entoni Fauchiga tayanib, Meduza xabar berdi.
Foto: The Naitonal Guard
Fauchining so‘zlariga ko‘ra, ushbu fuqaro 29-noyabr kuni topshirgan testning natijasi ijobiy chiqqan. Uning ta’kidlashicha, “omikron” yuqitirib olgan fuqaro oldin koronavirusga qarshi emlangan, biroq qo‘shimcha vaksinatsiyadan o‘tmagan.
Ta’kidlanishicha, bemorda kasallikning yengil belgilari kuzatilmoqda, uning ahvoli yaxshilanyapti.
Koronavirusning yangi shtammi so‘nggi kunlarda 20 dan ortiq mamlakatda qayd etilgan.
Eslatib o‘tamiz, oronavirusning ko‘p sonli mutatsiyaga ega yangi “omikron” (B.1.1.529) shtammi birinchi marta noyabr oyida Janubiy Afrikada topilgandi. JSST ma’lumotlariga ko‘ra, B.1.1.529 virusi organizmdagi protein tarkibiga ta’sir ko‘rsatishi mumkin. Amaldagi vaksinalar bu kabi o‘zgarishlarga yetarlicha samarador bo‘lmasligi aytilmoqda. Janubiy Afrikadan tashqari, “omikron” allaqachon Gonkong, Avstraliya va bir qator G‘arbiy Yevropa mamlakatlarida ham qayd etilgan.
Mavzuga doir:
Avvalroq O‘zbekiston koronavirusning “omikron” shtammi sabab 10 ta davlat bilan aviaqatnovlarni vaqtincha to‘xtatishi, JSST “omikron” shtammiga nisbatan qo‘llanilayotgan choralardan xavotirda ekani to‘g‘risida xabar berilgandi.
