Саудия Арабистони коронавируснинг «омикрон» штамми туфайли Умра зиёрати тартибини ўзгартирди

Саудия Арабистони COVID-19 нинг янги «омикрон» штамми тарқалиши муносабати билан Умра зиёрати тартибини ўзгартирди. Янги қоидаларга кўра, чет элликлар зиёратни амалга ошириши учун қиролликда тасдиқланган икки компонентли COVID-вакциналаридан бири билан эмланган бўлиши керак. Бу ҳақда Al Jazeera телеканалига таяниб, Asia Plus хабар берди.

Жаҳон соғлиқни сақлаш ташкилоти (ЖССТ) томонидан тасдиқланган, аммо қиролликда рўйхатдан ўтмаган вакциналар билан эмланган зиёратчилар уч кунлик карантиндан ўтиши ҳамда уларнинг изоляцияга олинганидан 48 соат ўтгач топширган ПЗР-тести салбий чиқиши керак.

Саудия Арабистони ҳукумати қарорига кўра, чет эллик зиёратчиларнинг қиролликда қолиш муддати 30 кунгача узайтирилди. Илгари хорижликларга Умра зиёрати вақтида мамлакатда 10 кун қолишга рухсат бериларди. Шунингдек, Умра зиёрати 18 ёшга тўлган шахсларга ҳам рухсат этилгани хабар қилинмоқда.

Таъкидланишича, хорижлик зиёратчилар учун янги қоидаларнинг жорий этилишига мамлакатда биринчи марта «омикрон» штамми билан касалланиш ҳолати аниқлангани сабаб бўлмоқда. Саудия Арабистони Соғлиқни сақлаш вазири Фаҳд ал-Жалоил «қироллик дунёдаги вазиятнинг қандай тус олишини кузатишда давом этишини» айтди ва барча зиёратчиларни «хавфсизлик чоралари ва чекловчи қоидаларга риоя қилишга» чақирди.

Meduza нашрининг Россия тўғридан-тўғри инвестициялар фондига (RTIF) таяниб, хабар беришича, Саудия Арабистони ҳукумати COVID-19 га қарши Россиянинг «Спутник V» вакцинаси билан эмланган одамларга қиролликка киришга рухсат беради. Хабарга кўра, мазкур қарор 2022 йил 1 январдан кучга киради. Бундан ташқари, «Спутник V» билан эмланганлар мамлакатга кириш вақтида 48 соатлик карантиндан ва ПЗР-тестидан ўтиши керак.

« ‘Спутник V’ билан эмланган шахсларнинг Саудия Арабистонига кириши диндорларга Макка ва Мадина шаҳарларидаги исломнинг муқаддас қадамжоларига (Ҳаж ва Умра) зиёрат қилиш имконини беради», — дейилади RTIF хабарида.

Эслатиб ўтамиз, 2021 йилнинг 10 августидан Саудия Арабистони ҳукумати чет элликларга Умра зиёратини амалга оширишга рухсат берганди. Ўша пайтда зиёратчилардан қиролликда тасдиқланган Pfizer, Moderna, Johnson & Johnson, AstraZeneca вакциналаридан бири билан эмланган бўлиши ёки манфий жавобли ПЗР-тестни тақдим этиши талаб этилган. Вакцина олмаган зиёратчилар мамлакатга келганидан кейин уч кунлик карантиндан ўтиб, сўнг коронавирусга нисбатан қайтадан ПЗР-тест топшириши керак эди.