АҚШ разведкасининг махфий маълумотларига кўра, Хитой Атлантика океани соҳилида жойлашган Экваториал Гвинеяда ҳарбий база қуришни режалаштирмоқда. Бу ҳақда The Wall Street Journal газетаси Америка ҳукуматининг кимлигини ошкор этмаган вакилларига таяниб маълум қилди, деб хабар беради «Интерфакс».
Газетанинг ёзишича, Хитой шу орқали ҳарбийлар учун биринчи доимий дислокация пунктига эга бўлиши мумкин.
АҚШ ҳукумати вакиллари разведка маълумотларини батафсил ошкор этмаган, бироқ ушбу ҳисобот Оқ уй ва Пентагонда катта хавотир уйғотган. Октябрь ойида АҚШ миллий хавфсизлиги бўйича масалаҳатчисининг ўринбосари Жон Файнер Экваториал Гвинеяга мамлакат президенти Теодоро Обиан Нгема Мбасогони Хитой таклифини рад этишга кўндириш мақсадида ташриф буюрганди.
«Денгиз соҳасидаги дипломатиямиз доирасида биз Экваториал Гвинеяга Хитой фаоллигини ўз ичига оладиган маълум потенциал қадамлар, миллий хавфсизлик нуқтаи назаридан хавотирларни келтириб чиқаришини айтдик», — дея газета Америка админстрацияси вакилининг сўзларини келтирган.
Оқ уйдаги манбалардан бирининг қайд этишича, Хитойни Экваториал Гвинеяда денгиз порти ва мамлакатнинг энг йирик шаҳри Бата қизиқтираётган бўлиши мумкин: ҳозирда Гвинея кўрфазида Хитой томонидан қурилган чуқур денгиз тижорат порти мавжуд. The Wall Street Journal маълумотларига кўра, АҚШ разведкаси Хитойнинг Экваториал Гвинеядан ҳарбий мақсадларда фойдаланишга бўлган қизиқишини 2019 йилда пайқаган. Аввалроқ АҚШ мудофаа соҳаси вакиллари Пекиннинг бу каби режалари ҳақида гапирган эди.
WSJ’нинг эслатишича, Хитой хориждаги биринчи базасини 2017 йилда Жибутида қурган — у АҚШнинг Африкадаги 4,5 минг ҳарбий хизматчиси жойлаштирилган Camp Lemonnier базаси яқинида. Шу билан бирга газетанинг таъкидлашича, сўнгги 20 йил ичида Хитой давлат компаниялари Африкада 100 та савдо портларини қурган. 2021 йилнинг баҳорида АҚШ разведкаси Хитой БААдаги савдо портида махфий ҳарбий база қураётганини аниқлаган. Оқибатда Вашингтон БАА ҳукуматини ушбу қурилишни вақтинча бўлса-да, тўхтатишга кўндирган. Бундан ташқари, Америка расмийлари Мавританиядаги маҳаллий ҳокимиятларга Пекин томонидан бу ерда қурилган портдан ҳарбий мақсадларда фойдаланишга уринишларига йўл қўймасликни тавсия қилгани маълум бўлган.
Пентагон томонидан 2021 йилда Конгрессга тайёрланган ҳисоботда келтирилишича, АҚШ Мудофаа вазирлиги Хитой Кения, Танзания, Ангола ва Сейшел оролларида ҳарбий базаларини қуриш истиқболларини кўриб чиқаётганини тахмин қилмоқда.
Аввалроқ АҚШ КХДР томонидан баллистик ракеталарнинг ишлаб чиқарилиши минтақадаги вазиятни беқарорлаштиришини маълум қилганди.
Изоҳ (0)