АҚШнинг Мичиган штати Оксфорд шаҳридаги мактабда юз берган отишмада уч киши ҳалок бўлди, саккиз киши яраланди. Бу ҳақда Associated Press хабар берди.

Фото: AP Photo

Ўт очишда гумонланувчи — 15 ёшли мактаб ўқувчиси. 911 рақамига қилинган қўнғироқдан сўнг мактабга етиб келган полиция ўспиринни бир неча дақиқа ичида қўлга олган. Ҳужумнинг сабаблари ва ҳужумчининг исми маълум эмас.

Ҳодисада 14—17 ёшли мактаб ўқувчилари ҳалок бўлган. Улардан бири шифохонага олиб кетилаётганда полиция машинасида жон берган. Жабрланганлар орасида — бир ўқитувчи ҳам бор, у елкасидан енгил жароҳат олган, айни пайтда касалхонадан чиқарилган. Қолган етти нафар ярадор ўқувчи шифохонада қолмоқда, баъзиларининг аҳволи оғир, дейилади хабарда.

Маълум бўлишича, гумонланувчи ярим автоматик тўппончадан ўқ отган. Қуролни унга бир ҳафта олдин отаси сотиб олиб берган. Қўлга олингач, ўқувчининг ота-онаси полиция бўлимига бориб, унга терговчиларга ҳеч қандай кўрсатма бермасликни тавсия қилган.

Расмийларнинг маълумотларига кўра, отишмадан бир кун олдин маҳаллий ижтимоий тармоқларда мактабга ҳужум қилиш ҳақида таҳдидлар пайдо бўлган.

10 ноябрь куни Жанубий Дакота штатидаги Скотленд шаҳрида номаълум шахс кўча ўртасида отишма содир этганди. Ҳодиса оқибатида икки киши ҳалок бўлган, яна уч киши яраланган.

18 октябрь куни Россиянинг Перм шаҳри яқинидаги Сарс қишлоғида 12 ёшли ўспирин мактабга ов карабини (қисқа стволли милтиқ) билан келиб, ўт очганди. Ҳодиса дарслар бошланишидан олдин юз берган, унинг натижасида ҳеч ким жабрланмаган. Ҳужумчи қўлга олинган.

Эслатиб ўтамиз, 20 сентябрь куни Перм давлат миллий тадқиқотлар университети талабаси Тимур Бекмансуров олийгоҳ ҳудудига милтиқ билан кириб, йўлида учраган одамга ўқ уза бошлаган. Ҳодиса туфайли талабалар деразалардан ташқарига сакраган. Кўпчилик ўз синфхонасида баррикадалар қуриб ўралиб олган. Ҳужумчи камида 30 марта ўқ узган, тахминларга кўра, ўқлар Ҳуглу 12 калибрли силлиқ стволли қуролдан отилган. Оқибатда олти киши ҳалок бўлиб, 43 киши жабрланган.