29—30 ноябрь кунлари Қатарда Америка делегацияси билан учрашув ўтказган «Толибон» вакиллари Афғонистон ҳудуди учинчи давлатларга ҳужум уюштириш ёки хавф туғдиришда фойдаланилмаслигини тасдиқлади. Бу ҳақда АҚШ Давлат департаментига таяниб, «Интерфакс» хабар берди.
«Толиблар Афғонистон ҳудудидан бирор-бир давлатга хавф туғдириш учун ҳеч кимнинг фойдаланишига имкон бермаслиги борасидаги ваъдасини тасдиқлади», — дейилади хабарда.
Таъкидланишича, АҚШ делегацияси «Толибон» етакчиларининг аёллар ва қизлар таълимининг барча даражасидан фойдаланишида қўллаб-қувватланиши борасидаги баёнотини алоҳида қайд этган ва «ушбу мажбуриятларни бажаришига қаттиқ чақирган».
«Толибон» таълим соҳасида қўллаб-қувватлашни сўраган ва таълимдан тўлиқ фойдаланиш имкониятини таъминлаш учун халқаро ҳамжамиятлар билан ишлашга тайёрлигини маълум қилган. Давлат департаменти аёллар ва қизларни барча даражадаги мактабларга жалб этиш борасидаги ютуқларни текшириш ва мониторинг қилиш борасидаги саъй-ҳаракатларни олқишлаган.
Шунингдек, маълум қилинишича, АҚШ Афғонистонда «Ал-Қоида» ва ИШИДнинг мавжудлигидан, инсон ҳуқуқларининг бузилиши ҳақидаги даъволардан хавотирда эканини билдиган. Улар толибларни «барча афғонларнинг ҳуқуқларини ҳимоя қилиш, умумий амнистия сиёсатини қўллаб-қувватлаш ва амалга ошириш, инклюзив ва вакиллик ҳукуматини шакллантириш учун қўшимча чоралар кўришга» чақирган.
Томонлар, шунингдек, халқаро ҳамжамиятларнинг Афғонистондаги гуманитар инқирозга муносабатини ҳам муҳокама қилган. АҚШ делегацияси БМТ ва гуманитар ташкилотларнинг жорий қиш мавсумида инсонлар ҳаётини сақлаб қолиш борасида уларнинг эҳтиёжларини қондириш учун ушбу тадбирларни кенгайтириш бўйича саъй-ҳаракатларини қўллаб-қувватлашни давом эттиришга ваъда берган.
Афғонистон бўйича махсус вакил Томас Уэст Twitter’даги саҳифаси орқали музокаралар давомида Америка томони толиблардан 2020 йилда қўлга олинган АҚШ фуқароси Марк Фрерихсни озод этишни ва афғон ҳукумат кучларининг собиқ ҳарбий хизматчиларининг ўлдирилишида айбдорларни жавобгарликка тортишни талаб қилган.
«Толибон» ТИВ матбуот котиби Абдулқаҳор Балхийнинг маълум қилишича, толиблар делегацияси АҚШни хавфсизни таъминлашга ишонтирган ва Афғонистоннинг музлатилган пулларини қайтаришни, «қора рўйхатлар» ва санкцияларни бекор қилишни ҳамда гуманитар масалаларни сиёсатдан ажратишни сўраган.
АҚШ делегациясига Афғонистон бўйича махсус вакил Томас Уэст бошчилик қилган бўлиб, унинг таркибидан Давлат департаменти, Молия вазирлиги, АҚШнинг халқаро тараққиёт ва разведка ҳамжамияти агентлиги вакиллари кирган.
Аввалроқ «Толибон» Ўзбекистон ва Тожикистон кўмагига муҳтож бўлмайдиган Ҳарбий ҳаво кучларини яратиш ниятида экани, «Толибон» етакчиси халқаро хайрия ташкилотларидан ёрдам сўрагани тўғрисида хабар берилганди.
Изоҳ (0)