АҚШ Савдо вазирлигининг Саноат ва хавфсизлик бюроси Хитойнинг 27 компаниясини АҚШ билан бизнес юритиши тақиқланган ташкилотлар рўйхатига киритди. Бюродагиларнинг фикрига кўра, ушбу компанияларнинг квант ҳисоблаш соҳасидаги ишланмаларидан ҳарбийлар фойдаланмоқда, деб ёзади Financial Times.
АҚШ савдо вазири Жина Раймондонинг айтишича, саккизта Хитой компанияси ҳарбий соҳани ривожлантиришга қаратилган «Пекин лойиҳалари» устида ишламоқда. Улар орасида яширин технологиялар ва сувости кемалари билан техникаларни топишга, шунингдек, АҚШнинг шифрлаш тизимларини бузишга қодир дастурлар бор.
Сиёсатчи Мартин Рассернинг сўзларига кўра, рўйхат Хитой ҳукуматининг ҳарбий соҳада қўлланилиши мумкин бўлган илғор технологияларни қўлга киритишига йўл қўймаслик мақсадида ташланган сўнгги қадамдир.
«Бу оқилона қадам ва Хитойнинг технологик ютуқларга эришиш бўйича саъй-ҳаракатларининг кўлами ҳақида муҳим эслатма. Айнан улар АҚШнинг миллий хавфсизлигига путур етказмоқда», — деди Мартен Рассер.
АҚШ ҳукумати «қора рўйхат»га, шунингдек, Покистон, Япония ва Сингапурнинг 13 компаниясини киритди. Қайд этилишича, улар ядровий ва баллистик ракета дастурлари билан боғлиқ лойиҳалар билан шуғулланган.
Июнь ойида АҚШ президенти Жо Байден Вашингтон наздида Хитой ҳарбий-саноат комплексига алоқаси бўлган 59 та ташкилотни «қора рўйхат»га киритган эди. Улар орасида дунёдаги энг йирик телекоммуникацион компаниялардан Huawei, China Mobile Communications Group Co., Ltd., China Telecommunications Corporation ва бошқа алоқа корхоналари бор.
Изоҳ (0)