Коронавируснинг «омикрон» штамми 20 та давлатда қайд этилди

Коронавирусининг янги «омикрон» штамми билан касалланиш ҳолатлари 20 га яқин мамлакат ва ҳудудда қайд этилди. Бу ҳақда CNN хабар берди.

Атиги бир кун ичида ушбу штамм Испания, Австрия, Японияга ҳамда Франциянинг хорижий ҳудуди бўлган Реюнион оролига етиб борган.

«Омикрон» билан касалланиш ҳолатлари аввалроқ Австралия, Бельгия, Ботсвана, Канада, Чехия, Дания, Германия, Гонконг, Исроил, Италия, Нидерландия, Португалия, Жанубий Африка, Швеция, Буюк Британияда аниқланган эди.

Коронавируснинг кўп сонли мутацияга эга янги «омикрон» (B.1.1.529) штамми биринчи марта ноябрь ойида Жанубий Африкада топилганди. Жаҳон  соғлиқни сақлаш ташкилоти маълумотларига кўра, B.1.1.529 вируси организмдаги протеин таркибига таъсир кўрсатиши мумкин. Амалдаги вакциналар эса бу каби ўзгаришларга етарлича самарадор бўлмаслиги айтилмоқда. Шунингдек, ЖССТда мавжуд дастлабки маълумотларга кўра, илгари коронавирусни бошдан ўтказган кишиларда «омикрон» билан қайта касалланиш хавфи юқори бўлиши мумкин.

Қозоғистон «омикрон» штамми сабаб 3 декабрдан Африканинг бир нечта мамлакати ва Гонконгдан келадиган фуқароларнинг мамлакатга киришини чекламоқда. Исроил ушбу штаммнинг тарқалишининг олдини олиш мақсадида дунёда биринчи бўлиб чет эл фуқаролари учун ўз чегараларини ёпиб қўйган эди.

Ўзбекистонда Санитария-эпидемиологик осойишталик ва жамоат саломатлиги хизмати бошлиғи ўринбосари, тиббиёт фанлари доктори, профессор Нурмат Отабеков «омикрон» штамми бўйича ўз фикрларини билдирган.

«Вируслар — оддий, ҳужайрасиз организмлар. Уларда ўзгарувчанлик юзага келиши табиий ҳол. Масалан, ҳозиргача коронавируснинг қўзғатувчиси, яъни SARS-CoV-2 нинг 7 мингдан зиёд мутацияга учраган штаммлари аниқлаган. ‘Омикрон’ ҳам шулардан бири», — деди мутахассис.

«Вакциналар SARS-CoV-2 нинг ҳар қандай мутацияга учраган штаммида самара беради. Ҳатто янги штаммни юқтириб олган ҳолатда ҳам, барча дозада эмланганларда касаллик енгил ва жиддий асоратларсиз ўтади», — дея қўшимча қилган Отабеков.