Коронавируснинг ЖАРда топилган «омикрон» штамми Австралияга етиб борди. Исроил ўз чегараларини 2 ҳафтага ёпди

Коронавируснинг Жанубий Африкада пайдо бўлгани тахмин қилинаётган «омикрон» штамми билан касалланиш бўйича Австралия, Германия, Италия ва Чехияда илк ҳолатлар қайд этилди.

Австралия соғлиқни сақлаш хизматларининг маълум қилишича, COVID-19 га тест топширган икки фуқарода инфекциянинг янги тури тасдиқланган. Гап Жанубий Африкадан Сиднейга қайтган сайёҳлар ҳақида кетмоқда.

Германияда ҳам «омикрон» штамми билан касалланиш бўйича иккита ҳолат тасдиқланган. Хусусан, ушбу ҳолатлар Мюнхен аэропортида аниқланган. Расмийлар инфекция юқтирганларнинг қайси давлатдан келганига аниқлик киритмаган. Шунингдек, янги штамм Мозамбикдан Италиянинг Милан шаҳрига  келган эркакда ҳам топилган.

Чехия Республикасида «омикрон» Намибияда бўлиб қайтган аёлдан аниқланган. Чехия телеканали хабар беришича, аёл илгари коронавирусга қарши эмланган. Касаллик енгил ўтмоқда.

Исроил ҳукумати коронавируснинг янги штамми тарқалишини олдини олиш мақсадида барча чет эл фуқаролари учун мамлакатга киришни вақтинча тақиқлади. Исроил бундай чорани эълон қилган дунёдаги биринчи давлатга айланди, деб ёзади «Едиот Ахронот» нашри. Чет элликларнинг Исроилга киришига қўйилган тақиқ 29 ноябрдан бошлаб икки ҳафта давомида амал қилади.

Хориждан қайтган Исроил фуқаролари уч кунлик карантиндан ўтиши керак. Шунингдек, фавқулодда чоралар амалда бўлган вақт давомида исроилликларга Африканинг «қизил зона» деб аталувчи 50 та давлатига бориш тақиқланди.

Ҳозирда Исроилда «омикрон» штаммига чалиниш бўйича битта ҳолат — Малавидан учиб келган аёлда тасдиқланган. Ушбу штаммни юқтиришда гумон қилинаётган яна етти нафар фуқаро текширувдан ўтказилмоқда.

Саудия Арабистони Ички ишлар вазирлиги 28 ноябрдан бошлаб Малави, Замбия, Мадагаскар, Ангола, Сейшел ороллари, Маврикий ва Комор оролларига парвозларни тўхтатди. Бунгача мамлакат Жанубий Африка, Намибия, Ботсвана, Зимбабве, Мозамбик, Лесото ва Эсватинига бориш-келиш рейсларини тўхтатиб қўйганди.

Мальдив ороллари ҳам янги штамм сабабли 28 ноябрдан бошлаб Африканинг юқорида айтиб ўтилган еттита давлатидан сайёҳларнинг келишини тақиқлади. Ушбу мамлакатлардан Мальдив оролларига сўнгги икки кун ичида келганлар икки ҳафталик карантиндан ўтиши керак, дейилади маҳаллий соғлиқни сақлаш вазирлиги баёнотида.

Бундан ташқари, Россия 28 ноябрдан бошлаб Жанубий Африка, Гонконг, Ботсвана, Лесото, Намибия, Зимбабве, Мозамбик, Мадагаскар, Эсватини ва Танзаниядан келувчи хорижликларнинг мамлакатга киришини чеклади. Россиянинг Танзания билан тўғридан-тўғри рейслари ёз ойларидан бери тўхтатилган эди, ушбу чеклов 2022 йил 1 февралгача чўзилди.

Коронавируснинг кўп сонли мутацияга эга янги «омикрон» (B.1.1.529) штамми биринчи марта ноябрь ойида Жанубий Африкада топилганди. ЖССТ маълумотларига кўра, B1.1.529 вируси организмдаги протеин таркибига таъсир кўрсатиши мумкин. Амалдаги вакциналар бу каби ўзгаришларга етарлича самарадор бўлмаслиги айтилмоқда.