Америкалик фотомухбир Стив Маккарри томонидан 1984 йилда олинган «Афғон қизи» номли сурат орқали бутун дунёга танилган Шарбат Гула Италиядан сиёсий бошпана олди. Бу ҳақда The Guardian’га таяниб, Tengrinews хабар берди.
Италия бош вазири Марио Драги офиси Гулага бошпана тақдим этилишидан ташқари, унинг Афғонистондан эвакуация қилинишини ҳам ташкиллаштирган.
Шарбат Гула бутун дунёга 1985 йилда — Стив Маккарри томонидан қочоқлар лагерида олинган сурат National Geographic журнали муқовасидан ўрин олганидан сўнг машҳурликка эришган. Суратда тасвирланган қизнинг исми узоқ вақт номаълум бўлган, уни кўпинча «афғон Мона Лизаси» деб атаб келишган.
Эслатиб ўтамиз, 2016 йилда Шарбат Гула қалбаки ҳужжатлар сабаб Покистонда ҳибсга олингани, у 14 йилгача озодликдан маҳрум этилиши мумкинлиги ҳақида хабарлар пайдо бўлган эди. Кейинроқ у Афғонистонга депортация қилинган, мамлакат собиқ президенти Ашраф Ғани унга янги хонадон калитини топширгани маълум бўлганди.
Изоҳ (0)