24 ноябрь куни Франция қирғоқлари яқинида ичида бир неча ўнлаб муҳожирлар бўлган пуфлама қайиқ чўкиб кетди. Франциядан Буюк Британияга йўл олган муҳожирлар ушбу қайиқ ёрдамида Ла-Манш бўғозидан ўтишга уринган. Ҳалокатга учраганларнинг айримлари Франция соҳил хизматлари томонидан қутқарилган бўлса-да, улардан 27 нафари чўкиб кетган. BBC хабарига кўра, қурбонлар орасида уч нафар бола ҳам бор. Бу воқеа Париж ва Лондон ўртасида Франциядан Буюк Британияга сузиб ўтаётган муҳожирлар масаласини қандай ҳал қилиш борасида бир неча йиллардан бери давом этаётган баҳсни авж олдирди, деб ёзади Meduza.
25 ноябрь куни Буюк Британия бош вазири Борис Жонсон ўзининг Twitter’даги саҳифасига Франция президенти Эммануэль Макронга мурожаат қилинган мактубни жойлади. Мурожаатномада Жонсон миграция инқирозини ҳал қилиш бўйича бир нечта таклифларни илгари сурган: масалан, бўғоз сувларида ҳамкорлидаги сув ва ҳаво патрулларини ишга тушириш, Ла-Манш бўйлаб ўтадиган муҳожирлар кемаларини аниқлашнинг юқори технологияли усулларидан, жумладан, радарлар ва сенсорлардан фойдаланиш таклиф қилинган.
Алоҳида мурожаатда Жонсон ўзининг олдинги таклифларини, жумладан, икки мамлакат бир-бирининг сувли ҳудудларига патруль кемаларини киритиши ва Британия қирғоқларига келган муҳожирларни Францияга қайтариш дастурини амалга ошириш зарурлигини қайд этган.
Парижда Жонсоннинг хатти-ҳаракатлари хуш кўрилмади. Макрон британиялик ҳамкасби ўз мактубини унга шахсан йўлламаганидан айниқса ғазабланган. «Бундай масалаларни мамлакатлар раҳбарлари Twitter’да ёки очиқ хатлар орқали кўриб чиқмайди», — деди Макрон ва бу ёндашувни «бемаънилик» деб атади. Шундан сўнг Франция Британия ички ишлар вазири Прити Пателга Европа Иттифоқи вазирларининг миграция инқирози бўйича йиғилишида иштирок этиш учун берган таклифини қайтариб олди. Йиғилиш 28 ноябрь куни Кале шаҳрида бўлиб ўтади.
Financial Times газетасининг ёзишича, французларнинг норозилигига сабаб шуки, уларнинг фикрича Буюк Британия Brexit туфайли юзага келган муаммолар учун Макронни жавобгарликка тортишга уринмоқда. Ўз навбатида, Британия расмийлари Франция президентининг муросасизлигини изоҳлар экан, Макрон апрель ойида президентликка қайта сайланиш учун курашиши, шу муносабат билан у миллатчи рақибларининг танқидларини қайтариши кераклигига ишора қилди.
Муҳожирларни Францияга қайтариш таклифи Франция томонидан бир неча бор рад этилган, дея қайд этади Financial Times. Франция ички ишлар вазири Жералд Дарманен сентябрь ойида буни «шантаж» деб атаган эди; Париж Буюк Британия бу масалани Европа Иттифоқи даражасида ҳал қилиши кераклигини таъкидламоқда.
Сўнгги пайтларда Франция-Британия муносабатлари бошқа сабабларга кўра ёмонлашгани сабабли муҳожирларга оид вазият ҳам мураккаблашди. Масалан, 26 ноябрь куни француз балиқчилари норозилик намойиши уюштириб, Ла-Манш орқали ўтадиган туннелни ва бўғоздан ўтувчи паромлар йўналишини тўсиб қўйди. Улар Британиянинг сувли ҳудудларида балиқ овлаш бўйича лицензия беришни талаб қилди. Британиянинг Европа Иттифоқидан чиқиши ҳақидаги келишув шартларига кўра, ушбу ҳудудларда ов учун балиқчиларда тегишли лицензия бўлиши керак.
BBC хабарига кўра, сўнгги ойларда Ла-Манш орқали қайиқда Британияга етиб боришга уринган муҳожирлар сони кескин ошган. Агар 2020 йилда ўн мингдан кам одам бўғоздан ўтишга уринган бўлса, 2021 йилда улар сони 25 мингдан ортган. Бўғозни кесиб ўтишнинг бундай усули шу қадар оммалашганки, Decathlon спорт дўконлари тармоғи Кале ва Франция шимолидаги бошқа порт шаҳарлардаги савдо нуқталарида қайиқлар сотишни тўхтатган.
Изоҳ (0)