Сочида Россия, Арманистон ва Озарбайжон етакчилари Владимир Путин, Никол Пашинян ва Илҳом Алиев иштирокида уч томонлама учрашув бўлиб ўтди, деб хабар беради Meduza.
Маълум қилинишича, музокаралар уч соатга яқин давом этган. Уч томонлама музокаралар бошланишидан олдин Путин Алиев билан, ундан сўнг Пашинян билан алоҳида учрашув ўтказган.
Уч томонлама учрашув якуни бўйича томонлар Озарбайжон ва Арманистон чегаралари ўртасида делимитация ва демаркация комиссиясини тузишга, шунингдек, чегарада «барқарорлик ва хавфсизлик даражасини кўтариш бўйича чоралар кўришга» келишиб олган.
Путиннинг аниқлик киритишича, демаркация механизмлари 2021 йил охирига қадар ишлаб чиқилади. Музокаралар якунида Россия президенти Пашинян ва Алиевга лавр новдасини совға қилган.
Аввалроқ, ноябрь бошларида Тоғли Қорабоғдаги жанговар ҳаракатлар тўхтатилганига бир йил тўлганида Озарбайжон ва Арманистон чегарасида яна тўқнашувлар бошланганди. Томонлар бир-бирини провокацияда айблаган. Жанглар бир неча кундан кейин — Россия аралашувидан сўнг тўхтатилган.
Мавзуга доир:
Чегарада вазият ёмонлашганидан сўнг, Арманистон Россиядан ҳарбий ёрдам сўради. Июнь ойида Арманистон бош вазири Никол Пашинян Москва билан Россия чегарачиларини Озарбайжон чегарасида жойлаштириш масаласини муҳокама қилганини айтди.
16 июль куни Озарбайжон Мудофаа вазирлиги Арманистон ҳудудидан мамлакат қуролли кучларининг позициясига ўт очилганини ва мазкур ҳаракатга жавоб қайтарилганини маълум қилди. Шунингдек, Озарбайжон президенти Илҳом Алиев Арманистонга тинчлик шартномаси имзолашни яна бир бор таклиф қилгани ҳақида хабар берилди.
Изоҳ (0)