WSJ: АҚШ Европадаги ҳарбий ўқувларини чеклаши ёки Россияга қарши санкциялар қўллаши мумкин

Жо Байден администрацияси «Москва билан қарама-қаршилик хавфини камайтириш» бўйича бир нечта вариантларни кўриб чиқмоқда: Украинани ҳарбий қўллаб-қувватлашни оширишдан тортиб дипломатияни фаоллаштиришгача. Бу ҳақда The Wall Street Journal’га таяниб, «Коммерсантъ» хабар берди. Газета маълумотларига кўра, вариантлардан бирида АҚШнинг Европадаги ҳарбий ўқувларини чеклаш ва Украинага ҳарбий ёрдам кўрсатишни тўхтатиш ҳам бор.

АҚШ ушбу вариантларни НАТОга аъзо мамлакатларнинг ташқи ишлар вазирлари учрашувида муҳокама қилиш ниятида. АҚШ давлат котибининг Европа ва Евросиё бўйича ёрдамчиси Карен Донфриднинг маълум қилишича, Вашингтон учрашувда муаммони ҳал этишнинг эҳтимолий вариантлари ҳақида гапиради. У Вашингтонда қандай таклифлар борлигига аниқлик киритмаган. WSJ маълумотларига кўра, учрашувдан олдин Жой Байден администрацияси мавжуд вариантларни муҳокама қилган.

WSJ версиясига кўра, АҚШ НАТОга қуйидагиларни таклиф қила олади:

• Украина мудофаа имкониятларини кучайтириш, ҳаво ҳужумидан мудофаа воситаларини етказиб беришни ва бошқа ҳарбий ёрдамларни кўрсатишни ошириш, шунингдек, Россияга қарши иқтисодий санкцияларни қўллаш;
• «Россияликларнинг фикрича, провокацион характерга эга» дейилган АҚШнинг Европадаги ҳарбий ўқувларини чеклаш ва Украинага ҳарбий ёрдам кўрсатишни тўхтатиш.

АҚШ президенти Жо Байден аввалроқ Россия ва Украина президентлари Владимир Путин ҳамда Владимир Зеленский билан «катта эҳтимолга кўра» музокаралар ўтказишини маълум қилган. Зеленский эса ундан олдинроқ Россия қўшинларининг Украина яқинида жойлаштирилиши билан боғлиқ вазият баҳордаги ҳолатчалик эмаслигини айтганди. Унинг таъкидлашича, ҳарбийлар сони ёздаги — Донбассда ўт очишга қўйилган тақиқ вақти билан таққослаганда ошган. Путин бўлса «ғарбдаги шериклар» Украинага «замонавий учиш қуролларини етказиб бериш, провокацион ҳарбий манёврларни ўтказиш билан» Донбассдаги вазиятни кескинлаштираётганини маълум қилган.

WSJ’нинг қайд этишича, Жо Байден администрациясидаги муҳокама Украина президенти Владимир Зеленскийнинг мамлакатда давлат тўнтаришига тайёргарлик кетаётгани борасидаги баёноти фонида бўлиб ўтган. Гўёки уларга Россия ва Украина фуқаролари хизмат кўрсатган ҳамда мамлакатнинг энг бадавлат инсонларидан бири Ринат Ахметов тилга олинган.