Туркманистон Жаҳон савдо ташкилотига (ЖСТ) аъзо бўлиш учун ариза берди. Бу ҳақда ташкилот бош директори Нгози Оконжо-Ивеала Twitter’да маълум қилган, ёзади «Интерфакс».
Туркманистоннинг ORIENT ахборот агентлиги хабарига кўра, ЖСТ бош директорига йўлланган ариза хати Туркманистон президенти Гурбангули Бердимуҳамедовнинг ўғли, бош вазир ўринбосари Сердар Бердимуҳамедов томонидан имзоланган. Аризани Туркманистоннинг Бирлашган Миллатлар Ташкилоти Женева бўлимидаги доимий вакили Атагелди Ҳалжанов топширган.
Ариза ЖСТга аъзо давлатлар ва кузатувчилар томонидан 2021 йил 30 ноябрдан 3 декабргача Женевада бўлиб ўтадиган 12-Вазирлар конференциясида кўриб чиқилади. Конференция сўнгги тўрт йил ичида биринчи марта ўтказилмоқда. Конференция ялпи мажлисида Туркманистон молия ва иқтисодиёт вазири Муҳамметгелди Сердаровнинг сўзга чиқиши режалаштирилган.
2020 йилнинг июль ойида Туркманистонга ЖСТда кузатувчи мақоми берилганди.
Жаҳон савдо ташкилоти 1995 йилда ташкил топган. ЖСТнинг мақсади — қоидаларга асосланган тизим доирасида савдони тартибга солишга ёрдам бериш, шунингдек, ҳукуматлар ўртасидаги савдо келишмовчиликларини объектив ҳал қилиш ва савдо музокараларини ташкил этиш. Ушбу фаолиятнинг асосини ЖСТнинг 60 та келишуви ташкил этади.
Ҳозирги вақтда ЖСТ таркибига 164 давлат, иккита қарам ҳудуд (Гонконг ва Макао) ҳамда Европа Иттифоқи киради.
Эслатиб ўтамиз, Шавкат Мирзиёев 26 ноябрь куни Ўзбекистонда амалий ташриф билан бўлиб турган ЖСТ бош котиби Кунио Микурияни қабул қилди. Қайд этилишича, суҳбат давомида Ўзбекистон ва ушбу халқаро тузилма ўртасидаги ўзаро манфаатли ҳамкорликни янада кенгайтириш масалалари кўриб чиқилган. Ўзбекистоннинг тез фурсатда Жаҳон савдо ташкилотига кириши билан боғлиқ масалаларда яқиндан ҳамкорлик қилиш зарур экани таъкидланган. Ўзбекистон ва Жаҳон божхона ташкилоти ўртасидаги амалий шерикликни кенгайтириш бўйича янги «йўл харитаси»ни қабул қилишга келишиб олинган.
Изоҳ (0)