Sochida Rossiya, Armaniston va Ozarbayjon yetakchilari Vladimir Putin, Nikol Pashinyan va Ilhom Aliyev ishtirokida uch tomonlama uchrashuv bo‘lib o‘tdi, deb xabar beradi Meduza.
Ma’lum qilinishicha, muzokaralar uch soatga yaqin davom etgan. Uch tomonlama muzokaralar boshlanishidan oldin Putin Aliyev bilan, undan so‘ng Pashinyan bilan alohida uchrashuv o‘tkazgan.
Uch tomonlama uchrashuv yakuni bo‘yicha tomonlar Ozarbayjon va Armaniston chegaralari o‘rtasida delimitatsiya va demarkatsiya komissiyasini tuzishga, shuningdek, chegarada “barqarorlik va xavfsizlik darajasini ko‘tarish bo‘yicha choralar ko‘rishga” kelishib olgan.
Putinning aniqlik kiritishicha, demarkatsiya mexanizmlari 2021-yil oxiriga qadar ishlab chiqiladi. Muzokaralar yakunida Rossiya prezidenti Pashinyan va Aliyevga lavr novdasini sovg‘a qilgan.
Avvalroq, noyabr boshlarida Tog‘li Qorabog‘dagi jangovar harakatlar to‘xtatilganiga bir yil to‘lganida Ozarbayjon va Armaniston chegarasida yana to‘qnashuvlar boshlangandi. Tomonlar bir-birini provokatsiyada ayblagan. Janglar bir necha kundan keyin — Rossiya aralashuvidan so‘ng to‘xtatilgan.
Mavzuga doir:
Chegarada vaziyat yomonlashganidan so‘ng, Armaniston Rossiyadan harbiy yordam so‘radi. Iyun oyida Armaniston bosh vaziri Nikol Pashinyan Moskva bilan Rossiya chegarachilarini Ozarbayjon chegarasida joylashtirish masalasini muhokama qilganini aytdi.
16-iyul kuni Ozarbayjon Mudofaa vazirligi Armaniston hududidan mamlakat qurolli kuchlarining pozitsiyasiga o‘t ochilganini va mazkur harakatga javob qaytarilganini ma’lum qildi. Shuningdek, Ozarbayjon prezidenti Ilhom Aliyev Armanistonga tinchlik shartnomasi imzolashni yana bir bor taklif qilgani haqida xabar berildi.
Izoh (0)