Соломон ороллари пойтахти Хониарада ҳукуматга қарши ўтказилаётган норозилик намойишлари иштирокчилари биноларга ўт қўйиб, дўконларга ўғирликка тушмоқда, деб хабар беради «ТАСС». Тартибсизликлар сабаб давлат муассасалари ва хизматларининг аксарияти ишини тўхтатган.
RNZ радиостанцияси маълумотларига кўра, Соломон оролларида 24 ноябрь куни ҳукуматга қарши бошланган норозилик намойишлари Хониаранинг шарқий ҳудудларини эгаллаган тартибсизликларга айланиб кетган. Шаҳарда маҳсулотлар, дори воситалари ва бирламчи товарлар етишмовчилиги кузатилмоқда, қатор туманларда электр энергияси ва сув таъминоти тўхтатилган.
Соломон ороллари бош вазири Манассе Согаваре шаҳардаги намойишлар ҳукумат томонидан 2019 йилнинг кузида қабул қилинган Тайван билан дипломатик муносабатларни тўхтатиш тўғрисидаги қарорини маъқулламайдиган «державалар» томонидан ташкиллаштирилганини маълум қилган. «Хитой билан алоқалари ривожланишини истамаётган мамлакатлар дипломатик муносабатларга киришимизга, халқаро ҳуқуқ ва БМТ резолюцияларига риоя қилишимизга тўсқинлик қилмоқда, айнан улар намойишчиларни қўзғатиб, қўллаб-қувватлаяпти», — дейди Согаваре.
Solomon Times нашри маълумотларига кўра, Хониарага ҳозирда Австралия федерал полицияси ходимлари етиб келган ва яқин соатлар ичида Австралия Ҳарбий денгиз кучларига тегишли ҳарбий кемаларнинг биридан 43 нафар ҳарбий хизматчи келиши кутилмоқда. Соломон оролларига ҳарбий ёрдам кўрсатилиши ҳақида 25 ноябрь куни Австралия ҳукумати раҳбари Скотт Моррисон маълум қилган. Унинг сўзларига кўра, орол давлат ҳудудига Мудофаа вазирлиги ва федерал полициянинг 100 дан ортиқ ходими юборилади. Бу каби ҳарбий ёрдам кўрсатиш бўйича қарорни Папуа—Янги Гвинея ҳукумати ҳам қабул қилиб, қўшни давлатга 30 нафар тинчликпарвар кучларини юборишга ваъда берган.
AFP агентлигининг ёзишича, полиция ходимлари бош вазирнинг хусусий қароргоҳига киришга уринган норозилик намойиши иштирокчиларини қувиш учун огоҳлантирувчи ўқларни узган. Ҳуқуқ-тартибот идоралари ходимлари оломонни тарқатиб юборишга ва намойишчиларни мамлакат пойтахти Хониара марказига қайтаришга муваффақ бўлган.
Соломон ороллари полиция комиссари (RSIPF) Хониара аҳолисини тартибсизликка қўшилмасликка ва ҳуқуқ-тартибот органларига намойишчиларни тўхтатишда ёрдам беришга чақирган.
24 ноябрь куни Хониарада ҳукуматга қарши норозилик намойишларини ўтказаётганлар парламент биносини эгаллашга уринган ва унга ўт қўйган. Ҳуқуқ-тартибот органлари аралашувидан кейин намойишчилар дўконлар, мактаб ва полиция участкаларига ўғирликка тушиб, уларни ёқа бошлаган. Маълум қилинишича, норозилик акциясини архипелаг шарқида жойлашган Малаита провинцияси аҳолиси ташкиллаштирган. Улар ҳукуматни минтақани ривожлантиришни истамасликда ва ўз ҳудудида бир қатор йирик лойиҳаларни амалга оширишдан бош тортишда айбламоқда.
Янги Зеландия ҳукумати Соломон ороллари пойтахтида содир бўлаётган тартибсизликлардан қаттиқ хавотирда эканлигини маълум қилган. «Янги Зеландия чоршанба кунидан бери Хониарада давом этаётган воқеалардан қаттиқ хавотирда. Мамлакатларимиз ўртасида чуқур ва мустаҳкам алоқалар мавжуд, биз Соломон оролларининг ҳукумати ва халқини қўллаб-қувватлаймиз», — деган мамлакат ташқи ишлар вазири Дэвид Паркер.
Шунингдек, идора раҳбари Янги Зеландия ҳукумати Австралиянинг Хониарага федерал полиция ва қуролли кучларни юбориш тўғрисидаги қарорини олқишлашини билдирган.
Изоҳ (0)