Бугун,

  • USD 10940.05
  • RUB 182.26
  • EUR 11121.65

Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, Ўзбекистонда гендер тенглигини таъминлаш комиссияси аъзоси Саида Мирзиёева аёлларга нисбатан зўравонликка кўз юмиб турилмаслигини маълум қилди.

Фото: Telegram / Саида Мирзиёева

Фото: Telegram / Саида Мирзиёева

Саида Мирзиёева 25 ноябрь куни ўз ишини бошлайдиган «Зўравонликка қарши 16 кунлик фаол саъй-ҳаракатлар» кампаниясининг «Биргаликда зўравонликни енгамиз!» халқаро форумида қатнашган. Қайд этилишича, тадбир Ўзбекистон аёлларини ҳар қандай жабр-ситамдан ҳимоя қилишга ёрдамлашишни кўзлаган.

«Аёлларга нисбатан зўравонликка қарши энг олдинги сафда курашаётган барча фидоий инсонларга чексиз миннатдорчилигимни билдирмоқчиман. Минг афсуски, гендер зўравонлик — глобал муаммо. Биз жамиятда бундай жирканч зўравонликка ҳеч қандай ҳолатда ҳам кўз юмиб турмаймиз.

Ўғил болаларга ҳам қиз болага куч ишлатмаслик кераклигини сингдириш зарур. Аёллар ҳуқуқларини таъминламасдан туриб, ривожланган ва гуллаб-яшнаётган жамиятни қуриб бўлмайди.

Мен аёлларга нисбатан ҳар қандай зўравонлик илдизини қуритиш йўлидаги курашда сизнинг олдингизда бўламан», — дейди Саида Мирзиёева.

«Сўнгги пайтларда бундай нохуш ҳолатлар жамоатчилик орасида анча тез овоза бўлмоқда. Бир томондан, бу ижобий ўзгариш — аёллар энди ноҳақликни гапиришдан қўрқмаяптилар. Бошқа томондан эса, бу ҳолатнинг қай даражада кенг тарқалгани кишини даҳшатга солади. Мамлакатимизда ҳар қандай зўравонлик илдизини қуритиш учун барча имкониятларни ишга соламиз. Олдимизда узоқ ва оғир йўл турибди. Бироқ биз бунинг уддасидан чиқамиз», — деб ёзади у.

Эслатиб ўтамиз, 2021 йилнинг майида Ўзбекистонда аёлларни реабилитация қилиш республика марказлари ташкил этилди. Марказларнинг асосий вазифаларидан бири тазйиқ ва зўравонликдан жабр кўрган, ўз жонига суиқасд қилган ёки ўз жонига қасд қилишга мойиллиги бўлган хотин-қизларга аноним тарзда шошилинч тиббий, психологик, ижтимоий, педагогик, ҳуқуқий ва бошқа ёрдам кўрсатиш ҳисобланади.

Изоҳ
Асосий янгиликлар