22 ноябрь куни АОКАда бўлиб ўтган брифингда Бандлик ва меҳнат муносабатлари вазирлиги ахборот хизмати раҳбари Мавжуда Мирзаева мажбурий меҳнатни олдини олиш, меҳнатни муҳофаза қилиш ва аҳоли бандлиги масалалари юзасидан маълумот берди.
Маълум қилинишича, 2021 йилнинг 10 ойи давомида 558 та содир бўлган бахтсиз ҳодисалар оқибатида 623 нафар ходим жабрланиб, шундан 166 нафар ходим ҳалок бўлган, 432 нафари оғир тан жароҳати ва 25 нафари енгил тан жароҳати олган.
Мазкур бахтсиз ҳодисаларнинг барчаси белгиланган тартибда махсус текшириш комиссиялари томонидан текширилди, шунингдек, текшириш жараёнида бахтсиз ҳодисаларни келиб чиқиш сабаблари аниқланиб, бахтсиз ҳодиса оқибатида жабрланган 623 нафар ишчи ва ходимларни қонуний ҳуқуқларини ҳимоя қилиш бўйича хулосалар қилинган.
Аввалроқ Бухоро вилояти Когон шаҳрида тупроқ ўпирилиши оқибатида 2 киши ҳалок бўлгани, Давлат меҳнат инспекцияси иш вақтида вафот этган Бош прокуратуранинг 33 ёшли ходими иши бўйича изоҳ бергани, Ўзбекистонда 2021 йил бошидан буён 5 киши саноат корхоналаридаги бахтсиз ҳодисалар оқибатида вафот этгани тўғрисида хабар берилганди.
Эслатиб ўтамиз, 20 январь куни «Янги Ангрен» иссиқлик электр станциясининг профилактика чораларини кўриш учун тўхтатилган 5-энергия блокида чанг-кўмирли ҳаво аралашмасининг портлаши содир бўлган, портлаш оқибатида уч киши ҳалок бўлган ва яна уч киши жароҳат олганди. Кейинроқ портлаган цехнинг раҳбари ўзини осиб қўйгани маълум бўлган.
Изоҳ (0)