“Ayollarga nisbatan har qanday zo‘ravonlik ildizini quritish yo‘lidagi kurashda sizning oldingizda bo‘laman” — Saida Mirziyoyeva

Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, O‘zbekistonda gender tengligini ta’minlash komissiyasi a’zosi Saida Mirziyoyeva ayollarga nisbatan zo‘ravonlikka ko‘z yumib turilmasligini ma’lum qildi.

Saida Mirziyoyeva 25-noyabr kuni o‘z ishini boshlaydigan “Zo‘ravonlikka qarshi 16 kunlik faol sa’y-harakatlar” kampaniyasining “Birgalikda zo‘ravonlikni yengamiz!” xalqaro forumida qatnashgan. Qayd etilishicha, tadbir O‘zbekiston ayollarini har qanday jabr-sitamdan himoya qilishga yordamlashishni ko‘zlagan.

“Ayollarga nisbatan zo‘ravonlikka qarshi eng oldingi safda kurashayotgan barcha fidoiy insonlarga cheksiz minnatdorchiligimni bildirmoqchiman. Ming afsuski, gender zo‘ravonlik — global muammo. Biz jamiyatda bunday jirkanch zo‘ravonlikka hech qanday holatda ham ko‘z yumib turmaymiz.

O‘g‘il bolalarga ham qiz bolaga kuch ishlatmaslik kerakligini singdirish zarur. Ayollar huquqlarini ta’minlamasdan turib, rivojlangan va gullab-yashnayotgan jamiyatni qurib bo‘lmaydi.

Men ayollarga nisbatan har qanday zo‘ravonlik ildizini quritish yo‘lidagi kurashda sizning oldingizda bo‘laman”, — deydi Saida Mirziyoyeva.

“So‘nggi paytlarda bunday noxush holatlar jamoatchilik orasida ancha tez ovoza bo‘lmoqda. Bir tomondan, bu ijobiy o‘zgarish — ayollar endi nohaqlikni gapirishdan qo‘rqmayaptilar. Boshqa tomondan esa, bu holatning qay darajada keng tarqalgani kishini dahshatga soladi. Mamlakatimizda har qanday zo‘ravonlik ildizini quritish uchun barcha imkoniyatlarni ishga solamiz. Oldimizda uzoq va og‘ir yo‘l turibdi. Biroq biz buning uddasidan chiqamiz”, — deb yozadi u.