Урганчда жадвалда бўлмаган рейсга чипта сотган Россия авиакомпаниясига қўйилган тақиқ олиб ташланди

Россиянинг I-Fly  Airlines авиакомпанияси 25 ноябрдан бошлаб Ўзбекистонга парвозларини қайта тиклайди. Бу ҳақда «Ўзавиация» агентлиггиа таяниб, «Интерфакс» хабар берди.

Ўзбекистон авиация расмийлари икки ҳафталар олдин I-Fly  Airlines авиакомпаниясига Ўзбекистонга парвозларни амалга ошириш учун вақтинча тақиқ қўйганди. Агентлик маълумотларига кўра, авиакомпания рўйхатда кўрсатилган барча муаммоларни бартараф этган ва мамлакатнинг учта шаҳри — Навоий, Урганч ва Наманганга чартер рейсларини қайта тиклаши мумкин.

«Агар кейинчалик улар талабларимизни бузмаса, барчаси яхши бўлади, улар рухсат олади», — дея таъкидлаган «Ўзавиация» вакили.

Эслатиб ўтамиз, 4 ноябрь куни Урганч аэропортида рейси жадвалда бўлмаган 290 нафар йўловчи тўпланган эди. Улар I-Fly  Airlines авиакомпаниясининг Урганч—Москва йўналиши бўйича рейсида учиш учун келган, бироқ бу парвоз жадвалда мавжуд бўлмаган.

2020 йилнинг октябрь ойида авиакомпанияларга Ўзбекистон аэропортларига чартер рейсларини амалга ошириш учун ваколатли орган «Ўзавиация» агентлигидан тегишли рухсатнома олмасдан туриб авиачипталарни сотиш амалиётини тугатиш тўғрисида огоҳлантириш хати юборилган.

I-Fly Airlines авиакомпанияси ушбу огоҳлантиришга қарамай, тегишли рухсатномаларни олмасдан қўпол равишда талабларни бузиб, 2021 йил ноябрь ойида Москва–Урганч–Санкт-Петербург–Урганч–Москва, Навоий–Москва ҳамда Санкт-Петербург—Навоий–Санкт-Петербург йўналишларида чартер парвозлари учун авиачипталар сотувини ташкил этган. Натижада авиачиптада кўрсатилган вақтда йўловчилар аэровокзалларга келган ва белгиланган йўналишда парвознинг бажарилмаслиги йўловчилар ўртасида ижтимоий кескинликка олиб келган. Шу муносабат билан «Ўзавиация» томонидан I-Fly Airlines’га санкция тариқасида Ўзбекистонга чартер парвозларини амалга оширишларини вақтинчалик тўхтатиш тўғрисида қарор қабул қилинган эди.

Аввалроқ Ўзбекистон Транспорт вазирлиги 2021/2022-қиш мавсуми парвозлар жадвалига мувофиқ Россия авиакомпанияларининг Ўзбекистонга мунтазам парвозларни амалга ошириш бўйича тасдиқланган йўналишлари рўйхатини эълон қилганди.