Беларусь мухолифати етакчиси Тихановская Меркелнинг Лукашенко билан мулоқотини танқид қилди

Беларусь президентлигига собиқ номзод, мухолифат етакчиси Светлана Тихановская Германия канцлери вазифасини бажарувчи Ангела Меркелни Беларусь президенти Александр Лукашенко билан телефон суҳбати ўтказгани учун танқид қилди. Бу ҳақда Deutsche Welle хабар берди.

Нашрнинг ёзишича, ўтган ҳафта Лукашенко ва Меркель икки марта телефон орқали гаплашиб, Польша билан чегарадаги инқирозни муҳокама қилган ва алоқаларни давом эттиришга келишиб олган, бироқ Тихановская бу ўзаро ҳамкорлик у учун тушунарсиз эканини билдирган.

«Беларусь халқига бу жуда ғалати туюлди», — деди Тихановская Венада ўтказилган Беларусь фуқаролик жамияти конференциясидаги иштирокидан сўнг.

Тихановская Меркель нима сабабдан Лукашенко билан алоқага чиққанини (чегаралардаги вазиятни юмшатиш учун) тушунишини тан олса-да, у Европа Иттифоқи етакчилари Лукашенко билан «ҳар қандай алоқадан ўзини тийиши» кераклигини таъкидлади.

Шундан сўнг Меркель Тихановская билан телефон орқали мулоқот қилган, суҳбат давомида у Беларусдаги сиёсий инқироз даврида демократик жараёнларни қўллаб-қувватлашини яна бир бор билдирган.

«Канцлер федерал ҳукумат Беларусь демократик ҳаракатини қўллаб-қувватлашда давом этишини таъкидлади», — деди ҳукумат матбуот котиби Штеффен Зайберт.

Унинг сўзларига кўра, Меркель Лукашенко ҳукуматининг «ҳалол ва эркин сайловлар йўли билан инқирозни ҳал қилиш учун мухолифат ва мустақил журналистларга қарши репрессияларни тўхтатиши, маҳкумларни озод қилиши ва жамият билан жиддий мулоқотга киришиши» зарурлигини таъкидлаган.

Лукашенко Германия канцлери Ангела Меркель билан телефон суҳбати чоғида қочқинларнинг катта қисмини ўз ватанига қайтаришга кўмаклашишга ваъда берган. Бироқ бунинг учун Европа Иттифоқи Польша билан чегара яқинидаги лагерда бўлиб турган 2000 киши учун гуманитар йўлак очиши кераклигини айтган. Ангела Меркель гўёки Германия учун бундай йўлак очиш бўйича Европа Иттифоқи расмийлари билан музокара олиб боришга ваъда берган.