Россиянинг А.С.Пушкин номидаги Рус тили давлат институти томонидан «спутник» сўзи 2021 йил сўзи деб тан олинди. Бу ҳақда Meduza хабар берди.
«Таҳлил натижалари бўйича ‘спутник’ сўзи биринчи ўринга чиқди; 2021 йилда бу сўздан аввалги йилларга қараганда тўққиз марта кўпроқ фойдаланиш бошланган. Бу сўз Россия вакцинасининг номи билан чамбарчас боғлиқ бўлиб, ундан фойдаланиш частотасининг ортиши эмлаш мавзуларининг кенг муҳокама қилиниши ва Россия вакцинасининг чет элда тан олиниши билан боғлиқ», — дейилади институт матбуот хизмати хабарида.
Россияда қўлланган энг кўп сўзлар бўйича иккинчи ўринни «Афғонистон» сўзи эгаллади. Афғонистонда «Толибон»нинг ҳокимият тепасига келиши билан боғлиқ воқеалар фонида бу сўз Россияда 6,5 баробар кўп ишлатила бошланган.
«Афғонистон мавзуси Россия учун жуда нозик, чунки кўпчилик Совет қўшинларининг кириб келиши ва олиб чиқилишини яхши эслайди. Айтишимиз мумкинки, янгиликлар лентаси рус ( кенгроқ айтганда, русийзабон) жамиятининг уйқудаги жароҳатига таъсир қилди ва бу шиддатли реакцияга сабаб бўлди», — деди «Йил сўзи» лойиҳаси раҳбари, филология фанлари доктори Михаил Осадчий.
Фойдаланиш частотаси бўйича учинчи ўриндан «Шимолий оқим» ибораси жой олган. У Болтиқ денгизида «Шимолий оқим 2» газ қувури қуриб битказилгани, шунингдек, октябрь ойининг асосий мавзусига айланган газ инқирози муносабати билан муомалага қайтди, дея тушунтирди Осадчий.
Шунингдек, 2021 йилда тез-тез ишлатила бошлаган сўзлар қаторида Пушкин институти «рўйхатга олиш» («перепись»), «импичмент», «QR- код», «эмланишга қарши» (антипрививочник») «антивакциначи», «сайловлар», «ишламайдиган» («нерабочний») ва «ўлим» («смертность») сўзларини келтирди.
2020 йилда Пушкин номидаги Рус тили институти «ўзини-ўзи яккалаш» («самоизоляция») ва «ноллаштириш» («обнуление»)ни йил сўзлари деб эълон қилганди.
Аввалроқ инглиз тилининг Оксфорд луғати (ОED) ҳам 2021 йил сўзини танлаганди. ОED сайтида эълон қилинган маълумотларга кўра, «vax», яъни «вакцина» ва «вакцинация» 2021 йил сўзига айланган.
Изоҳ (0)