АҚШнинг Нью-Йорк шаҳрида 10 000 дан ортиқ полиция, ўт ўчирувчилар ва бошқа ходимлар шаҳар мери Билл де Блазионинг барча шаҳар ишчиларини COVID-19 га қарши эмлаш бўйича топшириғига риоя қилмагани учун 1 ноябрь куни ҳақ тўланмайдиган таътилга жўнатилди. Бу ҳақда New York Post хабар берди.
Нашрнинг ёзишича, Нью-Йоркдаги 2,3 мингга яқин ўт ўчирувчи эмланишни истамаётгани учун касаллик таътилига чиққан. Ходимлар етишмовчилиги туфайли шаҳардаги 18 та ўт ўчириш станцияси ёпилди.
Ўт ўчирувчилар уларнинг аксарияти аллақачон COVID-19 билан касалланганини ва табиий иммунитетга эга эканини, бу шаҳар ҳокимиятининг мажбурий эмлаш тўғрисидаги буйруғида ҳисобга олинмаганини таъкидлаб, кўплаб норозиликлар ўтказгандан сўнг ўз ишларини тарк этди.
Нью-Йорк мерияси маълумотларида қайд этилишича, 1 ноябрь ҳолатига 22,8 минг муниципал ходим коронавирусга қарши эмланмаган.
«Вазият беқарорлигича қолмоқда. Биз бўлинмаларни хизматга қайтариш ёки бошқа бўлинмаларни навбатчилик учун бу ҳудудга кўчириш мақсадида ходимларни ёллаяпмиз», — дейди ўт ўчириш департаменти вакили Жими Лонг.
20 октябрь куни Нью-Йорк мери Билл де Блазио ўт ўчириш ва полиция ходимлари учун мажбурий вакцинация эълон қилганди. Шаҳар раҳбарининг сўзларига кўра, вакцинадан бош тортганлар маошсиз таътилга жўнатилади. Бу 1 ноябргача вакцинанинг камида битта дозасини олмаганларга тегишли.
Де Блазио Twitter’да ёзишича, ҳали эмланмаган ишчиларнинг ярмидан кўпи имтиёзлар тўғрисида ариза билан мурожаат қилган ва бу сўровлар кўриб чиқилмоқда.
Ўз навбатида, ўт ўчирувчилар касаба уюшмаси вакиллари мердан вакцина олиш ёки олмаслик масаласини ҳал қилиш учун кўпроқ вақт беришни сўради.
«Агар кимдир фавқулодда вазиятларнинг секин жавоб қайтариши туфайли вафот этса, бу Билл де Блазионинг виждони ва унинг ҳаддан ташқари чоралари зиммасида бўлади. Умид қиламанки, бу аҳмоқ вазиятни имкон қадар тезроқ тузатади», — деб ёзди Бруклиндан конгресс аъзоси Никол Маллиотакис ўзининг Twitter’даги саҳифасида.
У мерни эмланишни истамаганлар учун уларнинг антитаналарини ҳафталик тестдан ўтказгандан сўнг хизматда қолиш имкониятини қайтаришга чақирди.
Аввалроқ, 20 октябрь куни АҚШ Касалликларни назорат қилиш ва олдини олиш маркази (CДC) раҳбари Рошел Валенски илгари Европанинг бир қанча давлатларида аниқланган АЙ4.2 — коронавирус дельта штаммининг янги варианти АҚШда қайд этилаётганини маълум қилганди. Бироқ ҳозирда АҚШда унинг ёйилиши ёки у билан касалланиш ҳолатларининг кўпайиши ҳақида маълумот йўқ.
Коронавируснинг биринчи бўлиб Буюк Британияда аниқланган янги AY.4.2 штамми ҳақидаги маълумотлар 19 октябрь куни Financial Times саҳифаларида пайдо бўлди. Ушбу мутация «ҳиндча» штаммга нисбатан 10-15 фоизга юқумлироқ бўлиши мумкин, дея огоҳлантирди Кембриждаги Сенгер институти ҳамда Лондон университет коллежининг Генетика институти мутахассислари.
Исроилда ҳам коронавируснинг ушбу янги вариантига чалиниш билан боғлиқ биринчи ҳолат қайд этилди.
Изоҳ (0)