Грузияда мухолифатчи фракция Саакашвилининг соғлиғи туфайли парламентга бойкот эълон қилди

Грузиянинг «Лело – Грузия учун ҳамкорлик» мухолифатчи фракцияси парламент ишини бойкот қилади ва мамлакат расмийларидан қамоқхонада очлик эълон қилган собиқ президент Михаил Саакашвилининг «соғлиғи ҳақида етарлича қайғуришни» талаб қилади. Бу ҳақда фракция аъзоси Саломе Самадашвили брифингда маълум қилди, деб ёзмоқда «ТАСС».

«‘Лело – Грузия учун ҳамкорлик’ фракцияси конституция ва парламент томонидан бизга берилган ҳуқуқдан фойдаланиб, шуни маълум қиладики, расмийлар Михаил Саакашвилининг соғлиғи ҳақида етарли даражада ғамхўрлик қилиб, унинг ҳаётига таҳдид солиши мумкин бўлган барча хавф-хатарларни бартараф этмагунча, парламентнинг ялпи мажлисларида қатнашмаймиз», — деди Самадашвили.

1 ноябрь куни Саакашвили ўзи асос солган «Ягона миллий ҳаракат» партияси депутатларига мурожаат қилиб, уларни мандатларидан воз кечишга ва парламентни тарк этишга чақирган. Депутатлар Анна Ситлидзе ва Нона Мамулашвили бу чақириқни бажаришга тайёр эканини эълон қилди, бироқ улар ҳали парламентга депутатлик ваколатларидан маҳрум қилиш илтимоси билан расман мурожаат қилмади.

«Лело – Грузия учун ҳамкорлик» фракцияси Грузия парламентида 150 ўринли еттита, «Ягона миллий ҳаракат» эса 31 та мандатга эга. Ҳукмрон «Грузия орзуси – Демократик Грузия» партияси энг катта фракция бўлиб, 84 нафар депутатга эга.

Эслатиб ўтамиз, 1 октябрь куни Михаил Саакашвили саккиз йилдан буён биринчи марта Грузияга келди. У чегарани ноқонуний кесиб ўтганлик айблови билан қўлга олинди. Шундан кейин Грузияда мухолифат норозилик намойишлари бошланди, улар Саакашвили озод этилишини талаб қилди. Ҳозир у Рустави шаҳридаги қамоқхонада, у ерда ўзини сиёсий маҳбус деб ҳисоблагани учун очлик эълон қилган.

Грузия Адлия вазирлиги собиқ президентни қамоқхона касалхонасига ётқизишни бир неча бор таклиф қилган, бироқ Саакашвили ва унинг адвокатлари бунга мутлақо қарши. Улар Грузиянинг собиқ раҳбарини хусусий фуқаролик клиникасига олиб боришни талаб қилмоқда.