АҚШ Ҳарбий денгиз кучларининг USS Connecticut ядровий сувости кемаси 2 октябрь куни номаълум объект билан тўқнашгани тўғрисида хабар берилганди. «Интерфакс»нинг ёзишича, тўқнашув сабабчиси сувости қояси бўлиб чиққан.
«Текширув давомида USS Connecticut Ҳинд—Тинч океани минтақасидаги халқаро сувларда ўз вазифасини бажараётиб, хариталарда қайд этилмаган сувости қояси билан тўқнашув содир этгани аниқланди», — дейилади АҚШ Ҳарбий денгиз кучлари хабарида.
Таъкидланишича, тергов натижалари АҚШ Еттинчи флоти қўмондони вице-адмирал Карл Томасга кўриб чиқиш учун топширилган, у эса «кейинги ҳаракатлар, жумладан, жиноий жавобгарликка тортишнинг мақсадга мувофиқлигини белгилайди».
Шикаст етган сувости кемаси 8 октябрь куни Тинч океанининг ғарбий қисмидаги Гуам оролида жойлашган базага кирган. У ерда текширув ўтказиш мақсадида ҳарбий мутахассислар гуруҳи етиб келган. 28 октябрь куни Конгресснинг қуролли кучлар бўйича қўмитаси йиғилишида АҚШ Ҳарбий денгиз кучларининг тадқиқотлар, ишлаб чиқариш ва харидлар бўйича вазири ўринбосари Жей Стафани Гуамдаги базанинг таъмирлаш имкониятлари чеклаганини билдирган.
iNews’нинг ёзишича, USS Connecticut сувости кемаси оролга разведка ишлари учун яқинлашган. Бу турдаги субмариналар жанговар ҳаракатлар ўтказишдан ташқари, разведка функцияларини бажаришга ҳам мўлжалланган.
Шу билан бирга, таъкидланишича, сувости рельефи билан тўқнашиш эҳтимоли жуда кам. Жанубий Хитой денгизида мунтазам ҳаракатларни амалга оширувчи АҚШ Ҳарбий денгиз кучлари бундан яхши хабардор. Тахминларга кўра, сувости кемаси Хитойга тегишли сунъий сувости объекти билан тўқнашиб кетган бўлиши мумкин. Орол яқинидаги денгиз чуқурлиги 300 метрга яқин.
АҚШ Ҳарбий денгиз кучлари маълумотларига кўра, Жануби-Хитой денгизи акваториясининг халқаро сувларида содир бўлган тўқнашув оқибатида экипажнинг 130 аъзосидан 11 нафарига жароҳат етган.
Изоҳ (0)