Кобулдаги шифохонада портлаш содир этилди. Ҳодиса оқибатида камида 15 киши ҳалок бўлган (видео)

Афғонистон пойтахти Кобулдаги Сардор Муҳаммад Довуд Хон номли ҳарбий шифохонанинг кириш қисмида номаълум шахс ўзини портлатиб юборди. У билан бирга камида 15 киши ҳалок бўлди, дея хабар берди Reuters.

Агентликнинг «Толибон» хавфсизлик кучлари вакилларига таяниб ёзишича, ҳодиса оқибатида 34 киши жароҳат олган.

Айрим оммавий ахборот воситалари иккита портлаш юз бергани ҳақида хабар бермоқда.

«Худкуш-террорчилик ҳужуми Соғлиқни сақлаш вазирлиги ёнида жойлашган 400 ўринли шифохонада содир бўлди», — дея воқеа гувоҳларидан иқтибос келтирган «РИА Новости» агентлиги.

Баъзи нашрлар портлашдан сўнг дарҳол отишма овозлари эшитилганини хабар қилди. Афғонистон матбуотига кўра, ҳужумлар ИШИДнинг Афғонистондаги бўлими — «Вилояти Хуросон» террорчилик ташкилоти жангарилари томонидан амалга оширилган.

Ҳозирча мамлакатда фаолият юритаётган қуролли гуруҳларнинг ҳеч бири ҳодиса учун жавобгарликни ўз зиммасига олмади. Август ойида Афғонистонда ҳокимиятни қўлга киритган «Толибон» ҳали воқеа юзасидан изоҳ бермаган.

15 октябрь куни Афғонистоннинг Қандаҳор шаҳрида жойлашган шиалар масжидида портлаш содир этилганди. Ҳодиса қурбонлари сони 62 кишига етган. Гувоҳларнинг айтишича, терактни тўрт нафар худкуш содир этган. Улардан икки нафари масжиднинг олд тарафидаги дарвоза ёнида ўзини портлатган, яна иккитаси бинога кириб, ичкарида ўзини портлатган.

Ундан бир ҳафта олдин, 8 октябрь куни мамлакат шимолидаги Қундуз шаҳрида яна бир шиалар масжидида портлаш юз берган. Ўшанда Франц-Пресс агентлиги манбаларга таяниб, камида 50 киши қурбон бўлгани ва 140 киши яраланганини хабар қилди. Aamaj News ҳодисага оид видеоматериаллар, шунингдек, гувоҳларнинг кўрсатмаларига таяниб, портлашда 100 га яқин одам ҳалок бўлгани ҳақида ёзган.

Мамлакатда давом этаётган портлашлар фонида «Толибон» ИШИД жиддий хавф туғдирмаслигини таъкидлаб, ИШИД аъзолари ҳибсга олинаётгани ва йўқ қилинаётгани ҳақида хабар берди.