Афғонистонда ҳокимиятини қўлга олган «Толибон» ҳаракатига қарши Афғонистон Миллий қаршилик фронтининг етакчиси Аҳмад Масъуд айни дамда Тожикистонда. Бу ҳақда халқ лашкари вакили, шимолий Панжшер вилояти губернаторининг собиқ ўринбосари Кабир Васик «ТАСС» билан суҳбатда маълум қилди.
«Аҳмад Масъуд ҳозир Тожикистонда, лекин гоҳ-гоҳида Афғонистонга бориб туради, у ерда мамлакатнинг турли минтақаларидаги қаршилик гуруҳлари билан учрашади», — дейди халқ лашкари вакили.
Унинг сўзларига кўра, Масъуд айни дамда «Толибон» жангариларига қарши туриш учун турли давлатлардан ёрдам олишга ҳаракат қилмоқда. «Масуд минтақа давлатлари ва бутун халқаро ҳамжамиятни ‘Толибонъга қарши курашиш зарурлигига ишонтирмоқчи. У турли мамлакатларга сафарлар уюштириб, уларнинг эътиборини Миллий қаршилик фронтига қаратишга ва қўллаб-қувватловига эришишга уринмоқда», — деди Васик.
Собиқ губернатор ўринбосари Тожикистон билан Панжшер фронтининг алоқалари яхши экани, мамлакат «Толибонъга қарши курашда афғон халқига доим катта ёрдам кўрсатиб келгани ва ҳозир ҳам кўрсатаётганини» таъкидлади.
23 сентябрь куни Тожикистон президенти Имомали Раҳмон Бирлашган Миллатлар Ташкилоти Бош Ассамблеясининг 76-сессиясида сўзлаган нутқида Афғонистонда сайловлар ўтказиш ва барча этник гуруҳлар вакиллари, жумладан, афғонистонлик тожиклар иштирокида кенг қамровли ҳукумат тузишга чақирганди. Унинг фикрича, Афғонистоннинг барча аҳолиси манфаатларини ҳисобга олмасдан тузилган ҳар қандай ҳукумат ҳалокатли оқибатларга олиб келиши мумкин. Бундан ташқари, Раҳмон Афғонистон ҳудудида халқаро терроризмнинг қайта тикланиши хавфидан огоҳлантирган.
29 октябрь куни Тожикистоннинг бир қанча ОАВлари Душанбеда Афғонистон миллий қаршилик фронтининг офиси очилгани ҳақида хабар тарқатди. Айни пайтда Тожикистон Ташқи ишлар вазирлиги уларда бу ҳақда ҳеч қандай маълумот йўқлигини маълум қилди.
Изоҳ (0)