Афғонистоннинг собиқ вице-президенти Амрулло Салоҳ «Толибон» жангариларини мамлакат шарқидаги Нангарҳор вилоятидаги тўй маросимида 13 кишини ўлдирганликда айблади. Бу ҳақда унинг Twitter’даги баёнотига таяниб, «ТАСС» хабар берди.
«‘Толибон’ жангарилари Нангарҳордаги тўй маросимида мусиқа овозини ўчириш учун 13 кишини ўлдирди. Биз ғазабимизни биргина қоралаш билан ифода эта олмаймиз. Бу режим узоқ давом этмайди, лекин, афсуски, у тугатилгунича афғонлар унга яна (ҳаёти билан) ҳақ тўлайди», — деб ёзди сиёсатчи ўзининг Twitter’даги саҳифасида. Бундан ташқари, Салоҳ Покистон раҳбариятини «афғон маданиятини йўқ қилиш» ва «уни диний ақидапарастлик билан алмаштириш» учун «Толибон»ни қўллаб-қувватлашда яна бир бор айблади.
Afghan Voice Agency маълумотларига кўра, воқеа 29 октябрь оқшомида Сурхруд туманида рўй берган, ўшанда «Толибон» жангарилари тўйда жонли мусиқа янграгани учун маросим иштирокчиларига қарата ўт очган. Агентлик манбаларига кўра, отишма оқибатида камида икки киши ҳалок бўлган, 10 киши яраланган ва маҳаллий шифохонага етказилган.
«Толибон» ҳаракати матбуот котиби, Афғонистон Муваққат Вазирлар Маҳкамасидаги ахборот ва маданият вазири ўринбосари Забиҳулла Мужоҳиднинг Twitter’да ёзишича, ўзини «Толибон» аъзоси деб таништирган уч киши тўй иштирокчиларига мусиқа чалгани учун танбеҳ берган, сўнг уларга қарата ўт очган. Унинг сўзларига кўра, уч киши ҳалок бўлган, яна бир неча маҳаллий аҳоли жароҳатланган. «Жиноят содир этганликда гумон қилинган икки киши аллақачон ҳибсга олинди ва улар шариат қонунлари асосида жавоб беради», — деди Мужоҳид.
Октябрь ойи бошида «Толибон» томонидан ташкил этилган Эзгуликни тарғиб қилиш ва иллатларни йўқотиш вазирлиги мамлакатда тўйларни ўтказиш учун қоидалар ўрнатди, улардан бири маросим пайтида жонли мусиқа ижро этилишини тақиқлайди.
Изоҳ (0)