Afg‘onistondagi harbiy-siyosiy inqiroz Mustaqil Davlatlar Hamdo‘stligi (MDH) mamlakatlari xavfsizligiga jiddiy tahdid solmoqda. Bu haqda Tojikiston prezidenti Emomali Rahmon 15-oktabr kuni Hamdo‘stlik davlatlari rahbarlari kengashining onlayn yig‘ilishi chog‘ida aytib o‘tdi.
“Afg‘onistondagi harbiy-siyosiy va gumanitar inqiroz mamlakatlarimiz xavfsizligiga jiddiy xavf tug‘dirdi”, — dedi davlat rahbari.
Uning ta’kidlashicha, BMT Xavfsizlik Kengashi tomonidan terrorchilik guruhlari ro‘yxatiga kiritilgan “Tolibon” harakatining qo‘shni davlatda hokimiyat tepasiga kelishi Tojikiston uchun “vaziyatni yanada murakkablashtirdi”. Shu nuqtayi nazardan, Rahmon Hamdo‘stlik mamlakatlarining xavfsizlik tuzilmalarini Afg‘onistondan kelib chiqayotgan tahdidlarga qarshi kurashda yanada yaqinroq jipslashtirishga chaqirdi.
Emomali Rahmonning aytishicha, Tojikiston MDH mamlakatlari hududida faoliyati taqiqlangan terrorchilik tashkilotlarining yagona ro‘yxatini tuzishda MDHga a’zo davlatlarning qo‘llab-quvvatloviga umid qilmoqda.
“Bizni, shuningdek, mamlakatlarimizda taqiqlangan, noqonuniy harakatlarini oqlash uchun xalqaro va mintaqaviy tuzilmalar platformalaridan foydalanadigan bir qator tashkilotlarning faoliyati ham tashvishlantirmoqda. Shu munosabat bilan, umid qilamizki, Tojikiston tomonidan taklif qilingan... (MDHga) a’zo mamlakatlar hududida taqiqlangan terrorchilik va ekstremistik tashkilotlarning yagona ro‘yxatini tuzish g‘oyasi birgalikda amalga oshiriladi”, — dedi prezident.
U, shuningdek, mintaqaviy xavfsizlik sohasida Hamdo‘stlikning ustuvorligi terrorizm, ekstremizmning barcha ko‘rinishlari — giyohvand moddalar, qurol-yarog‘ning noqonuniy savdosi, kiberjinoyatlar va transchegaraviy uyushgan jinoyatchilikka qarshi kurashda aks etishini ta’kidladi. Rahmon MDH faoliyati davrida hamkorlikning tegishli mexanizmlari, birinchi navbatda, aksilterrorchilik markazi yaratilganini va ular ish olib borayotganini esladi. “Qabul qilingan hujjatlar ijrosini davom ettirish va xavfsizlik sohasida MDHning me’yoriy-huquqiy bazasini yanada mustahkamlash muhim ahamiyatga ega”, — ta’kidladi Tojikiston rahbari.
Tojikiston prezidenti, shuningdek, MDHga a’zo davlatlarni biologik xavfsizlik va iqlim o‘zgarishiga qarshi kurash sohasidagi hamkorlikni kuchaytirishga chaqirdi. “Biologik xavfsizlik sohasida ortib borayotgan xavflar iqlim o‘zgarishi muammosi bilan bog‘liq bo‘lib, ular sohadagi hamkorligimizni zudlik bilan kuchaytirish zarurligini taqozo etmoqda”, — dedi davlat rahbari.
Uning so‘zlariga ko‘ra, asosiy vazifa — global isishning salbiy oqibatlariga, jumladan, muzliklarning erishi xavfiga o‘z vaqtida javob berish uchun zarur choralarni ko‘rish. Uning ta’kidlashicha, Tojikiston 2025-yilni Muzliklarni himoya qilish yili deb e’lon qilish tashabbusi bilan chiqqan, shuningdek, muzliklarni himoya qilish bo‘yicha maxsus xalqaro fond tashkil qilgan. “Umid qilamanki, ushbu tashabbuslar tashkilotimizga a’zo davlatlar tomonidan faol qo‘llab-quvvatlanadi”, — dedi prezident.
Izoh (0)