Яманнинг Мариб шаҳридаги масжид ва диний мактабга хусийлар томонидан амалга оширилган баллистик ракета зарбалари оқибатида 29 нафар тинч аҳоли, жумладан, аёллар ва болалар ҳалок бўлди. Бу ҳақда ҳукумат баёнотига таяниб, «РБК» хабар берди.
КУНА агентлигининг ҳарбийларга таяниб ёзишича, хусийлар Мариб томонга иккита ракета учирган.
Ямандаги можаролар 2014 йилдан бери давом этмоқда. Ҳарбий зиддиятлар 2015 йилнинг март ойида Саудия Арабистони бошчилигидаги коалиция кучларининг республика президенти Мансур Ҳодий тарафига келиб қўшилганидан сўнг кучайди. Уларга Эрон томонидан қўллаб-қувватланаётган «Ансар Аллоҳ» ҳаракати таркибига кирувчи яманлик исёнчилар қаршилик кўрсатмоқда.
Эслатиб ўтамиз, 2020 йилнинг июлида Яман марказий ҳукумати ва Жанубий ўтиш даври кенгаши сепаратистлари янги ҳукумат тузишга рози бўлганди. Шу орқали Яман Саудия Арабистонининг можарони тартибга солиш ва ўт очишни тўхтатиш режими борасидаги ташаббусини қўллаб-қувватлаган. Декабрь ўрталарида бош вазир Маин Абдул Малик бошчилигида ҳукумат шакллантирилган. 26 декабрь куни янги ҳукумат президент Мансур Ҳодийга қасамёд келтирган.
Жанубий ўтиш даври кенгаши 2017 йилда тузилган. Бир қанча муддат улар Яманнинг тан олинган ҳукумати билан биргаликда «Ансар Аллоҳ» хусийлар ҳаракатига қарши курашиб келган, бироқ кейинчалик ўрада можаро юзага келган. 2019 йилда сепаратистлар Аден шаҳрини эгаллаб олган, 2020 йилнинг апрелида эса Яманнинг барча жанубий вилоятларида ўз ўзини бошқариш режимини жорий этган.
Изоҳ (0)