Шимолий Македония бош вазири Заев иккинчи бор истеъфо берди

Шимолий Македония бош вазири Зоран Заев муниципал сайловларда «Македония ижтимоий-демократлар иттифоқи» партияси мағлубиятга учрагач, истеъфо бериш бўйича қарор қабул қилди. Бу ҳақда Reuters агентлигига таяниб, «РБК» хабар берди.

«Ҳукмрон партия номидан рақибларимизни муниципал сайловларда ғалаба қозонгани билан табриклаймиз. Уларнинг натижаси сабаб масъулиятни қабул қиламан. Бош вазир ва партия раиси сифатида истеъфо бераман», — дейди Заев.

31 октябрь куни Шимолий Македонияда муниципал ҳокимияти вакиллик органларининг раҳбарлари ва вакиллик органлари сайловининг иккинчи тури бўлиб ўтди. Сайлов комиссиясининг дастлабки маълумотларига кўра, 44 та муниципалитетда (мамлакатда улар жами 84 та; қолган муниципалитетларда номзодлар биринчи турда 50 фоиздан ортиқ овоз тўплаган) йирик мухолиф партия «Ички Македония инқилобий ташкилоти — Македония миллий бирлиги демократик партияси» ғалаба қозонган.

Мамлакатда муниципал сайловларнинг биринчи тури 17 октябрь куни бўлиб ўтган. Маҳаллий ҳукумат органи позицияси учун қатор сиёсий ташкилот ва партиялардан 350 нафар номзод курашган. Республикада овоз бериш ҳуқуқи жами 1 824 864 кишида мавжуд.

Зоран Заев Шимолий Македония ҳукуматини 2017 йилнинг майидан бери бошқариб келаётганди. Заев бошчилигидаги ҳукумат 2020 йилнинг 3 январида техник Вазирлар Маҳкамасига парламент сайловларига тайёргалик кўриш ҳуқуқини бериш учун режа асосида истеъфо берганди. Собиқ ички вазири Оливер Спасовский раҳбарлик қилган вақтинчалик техник ҳукумат парламент сайловлари натижаси эълон қилингунга қадар 100 кун давомида ҳукуматни бошқарди. Аввалига мамлакатда парламент сайловларини 2020 йилнинг охирида ўтказиш режалаштирилганди. Шимолий Македонияни Европа Иттифоқига қўшилиш борасидаги музокаралари бошланиш санасининг кечиктирилиши туфайли фуқаролар норозилиги юзага келиши мумкинлиги сабаб муддатидан олдин сайловлар ўтказилганди.

2020 йилнинг ёзида Заев муддатидан олдинги парламент сайловларида ғалаба қозониб, Шимолий Македония ҳукуматини яна эгаллаганди.