2020 йилнинг августида Байрут портида содир бўлган портлашнинг терговида Россиядан ёрдам сўраш ёки сўрамаслик борасидаги қарорни қабул қилиш Ливан суд органларининг қўлида. Бу ҳақда мамлакат бош вазири Нажиб Микатига таяниб, «Коммерсантъ» хабар берди.
«Агар суд ҳокимияти ташқи томондан қўшимча маълумот сўрашни маъқул деб топса, эътирозимиз йўқ. Барчамиз ҳақиқатнинг тагига етиб, уни билишни хоҳлаймиз», — дея таъкидлайди у.
Ўтган ҳафтада Сочида бўлиб ўтган «Валдай» халқаро клуби йиғилишида ливанлик политолог Рагида Дергам Владимир Путинга савол бериб, Россия терговга ёрдам бериш учун портдаги портлашнинг сунъий йўлдошдан олинган суратларни тақдим этишга тайёрми, дея юзланганди. Шунингдек, у ушбу суд ишида «Ҳизбуллоҳ»нинг позициясини баҳолашни ҳам сўраган.
«Тўғрисини айтсам, бирор-бир космик суратлар қандай ёрдам беришини яхши тушунмайман, ўзи у бизда борми? Аммо сизга ваъда бераман: албатта, мен ‘справка’ларни ёмон кўраман ва улар бизда бўлса ва биз терговга ёрдам кўрсатиш имкониятида бўлсак, биз буни амалга оширамиз. Мен аввал бу каби маълумотларга эга бўлиши мумкин бўлган ҳамкасбларим билан гаплашиб олишим керак», — деган Владимир Путин. Шунингдек, у «Ҳизбуллоҳ»ни Ливандаги «жиддий сиёсий куч» деб атаган.
Эслатиб ўтамиз, Ливан пойтахти Байрут шаҳридаги портда 2020 йилнинг 4 август куни аммиак селитраси сақланаётган омбор портлаганди. Портлаш кучи шу даражада бўлдики, унинг оқибатида бутун шаҳардаги бинолар зарар кўрди, 190 киши ҳалок бўлди, 300 мингдан ортиқ одам уйсиз қолди. Мамлакат расмийлари портлаш оқибатида юзага келган умумий зарарни 3-5 миллиард долларга баҳолади. Ҳодиса сабабли мамлакат ҳукумати истеъфога чиқди.
Изоҳ (0)