Франция Ташқи ишлар вазирлиги ҳузуридаги Европа ишлари бўйича давлат котиби Клеман Бон Александр Лукашенконинг қариндошларини одам савдосида айблади, деб хабар беради «Korrespondent.net».
Шу билан бирга, Клеман Бон Лукашенконинг айнан қайси яқинлари «бу каби бизнес билан шуғулланишини» ошкор этмаган.
Унинг баёнотида таъкидланишича, Лукашенконинг қариндошлари Беларусга келган мигрантларни мамлакатнинг Европа Иттифоқи билан чегарадош қисмларига сафарларини атайдан ташкил этиб келади. Амалдорнинг огоҳлантиришича, шу орқали Лукашенко «Европа ўз принципларини бузмоқда дея, Евроиттифоқни тузоққа тушириш» ниятида.
Франция ТИВ вакили Польша—Беларусь чегарасидаги вазият борасида «қатъий, аммо инсоний» ҳаракат қилишга чақирган.
Унинг сўзларига кўра, Беларусь томонининг мақсади — Европа Иттифоқини кучсизлантириш ва ажратиб юбориш.
Аввалроқ Беларусь ва Польша чегарасида 24 октябрь куни кечқурун 60 га яқин ноқонуний муҳожирлар гуруҳи Польшага бостириб кирмоқчи бўлгани, тартибсизликларда икки польшалик аскар яралангани тўғрисида хабар берилганди. Польша офицерлари чегарадан ўтганлар орасида симтўсиқни кесган фуқаролик кийимидаги беларуслик аскарларни таниб қолган.
Беларусь ва Европа Иттифоқи мамлакатлари чегарасидаги миграцион инқироз Александр Лукашенконинг Минск энди Европани муҳожирлардан ҳимоя қилмоқчи эмаслигини айтганидан кейин бошланди. Шундан сўнг, оммавий ахборот воситаларида хабар берилишича, беларуслик чегарачилар чегарани ноқонуний кесиб ўтмоқчи бўлган одамларга жиддий тўсқинлик қилмаслик ҳақида яширин кўрсатма олган.
Изоҳ (0)